O Nadal en Silleda arranca o 5 co acendido das luces e un espectáculo audiovisual na fachada do Concello

Música, obradoiros, teatro, deporte, e cine, entre outros, conforman unha programación para todos os públicos que se extenderá ata o 9 de xaneiro, día no que se celebra o Gran Sorteo de Nadal de ECOS

Laura Moure/Silleda

O Nadal volta a Silleda cunha variada e completa programación pensada para todos os públicos. Música, obradoiros, teatro, propostas para a mocidade, cine e actividades deportivas, entre outros conforman unha programación con máis de 40 actividades dende o 5 de decembro ao 9 de xaneiro.

A programación arrancará o venres día 5 co acendido do alumeado de Nadal e as máis de 500 regadeiras colocadas nas farolas de varias rúas da capital municipal, e balcóns, e dando paso a un variado programa para todos os públicos.

Deste xeito, e ao igual que o pasado ano, o Concello de Silleda súmase á iniciativa creada pola veciñanza do Barrio das Baratas, extendendo pola vila as orixinais regadeiras con luces que volverán adornar as rúas xunto con outros elementos decorativos en prazas e outros espazos públicos.

Foto de arquivo de outro Nadal.

A partir das 19:30 terá lugar na praza Siñor Afranio o espectáculo audiovisual “O crebanoces en Silleda”, sobre a fachada da casa consitorial. A xornada contará con chocolatada, en favor do alumnado de 6º de Primaria do CEIP de Silleda e tamén sorpresas para o público asistente.

Obradoiros en familia e iniciación a DJ’s

O domingo día 7 pola mañá terá lugar o primeiro dos obradoiros en familia, coa elaboración de adornos de Nadal sostibles con saída á natureza. Terá lugar no Centro Social de Silleda onde o domingo 14 se celebrará outro de elaboración de gallegas para a rapazada. Tamén a mocidade (de 12 a 17 anos) terá a oportunidade de iniciarse co mundo dos DJ’s na sesión que se celebrará o domingo 28 de decembro na Casa da Xuventude (11:30).

O martes 16 celebrarase tamén na Casa da Xuventude unha charla sobre menores e ocio nocturno, ás 19:00 horas.

Teatro, cine e clown

As artes escénicas terán o seu espazo na programación o martes 23, co espectáculo “Clown namorado”, ás 17:00 horas na praza Siñor Afranio e o venres 26 co espectáculo “A costureira”, de Cris Collazo no salón de actos do Concello (18:00 horas).

Tamén o 2 de xaneiro se celebrará no Salón Parroquial Santa Eulalia unha sesión de cine en familia coa proxección de “Amigos imaginarios” (18:00 horas).

Tubas Christmas e citas musicais

A música volve ter un protagonismo especial no programa. Así, ademais das audicións do alumnado da Escola de Música Municipal, o sábado 27 terá lugar no pavillón 1 da Semana Verde o Concerto de Nadal da Banda de Música Municipal de Silleda, que celebrará as súas vodas de prata cunha edición moi especial.

A Coral Polifónica Trasdeza celebra o seu concerto de Nadal o sábado 20 ás 19:30 na igrexa Santa Eulalia.

O luns día 29, ao mediodía o grupo de Tubas da EMUSI tamén ofrecerá un recital na praza Siñor Afranio. A música continuará na primeira fin de semana de 2026, ca celebración do tradicional concerto de Ano novo cas agrupacións da Bandeira no auditorio Manuel Dopazo o sábado 3 e como novidade o domingo 4 pola tarde as Bandas Infantíl e Xuvenil de Silleda ofrecerán un recital solidario de Reis no Salón Parroquial de Silleda.

Feira da alegría e citas deportivas solidarias

O CEIP Plurilíngüe de Silleda volverá poñer en marcha o xoves 11 de decembro a súa recoñecida Feira da Alegría, nesta edición en favor de ANEDIA (Asociación de nenas, nenos e Xente Nova con Diabetes de Galicia). A comunidade escolar tamén será protagonista doutros mercadillos ao longo do mes de decembro. Así o domingo 21 na praza Benito Rivas celebrase o de The Red Lion English School e o alumnado de 4º da ESO do IES Pintor Colmeiro estará tamén cas súas propostas de venda os venres pola tarde no pavillón de Silleda, auditorio Manuel Dopazo e o venres 19 en Vista Alegre.

O deporte tampouco faltará este Nadal en Silleda. Como novidade, incorpórase ao programa un torneo de baloncesto 3x3, que se disputará o sábado día 20 no pavillón municipal César González Fares.

Na xornada do sábado 27 o fútbol será protagonista con senllas citas solidarias: na Bandeira haberá torneo de veteranos e no pavillón César G. Fares volta o Torneo Solidario de Fútbol Biberón.

Obradoiros, ensiao Noitevella e xuntanza dos maiores

Os maiores tamén terán dous obradoiros este Nadal no Centro social o martes 16 e o xoves 18, con distintas propostas para a decoración desta época.

 Publicidade

Preme na imaxe para obter máis información.

A tradicional xuntanza de Nadal será este ano o xoves 11 no restaurante da Semana Verde e o ensaio de Fin de Ano volta ao Centro Social o luns 29.

San Silvestre e festas para despedir 2025

Tamén o sábado 27 pola noite terá lugar unha festa Pre Fin de Ano, con charanga e grupo musical, organizada pola asociación Xuventude Silleda, encargada das Festas de Verán, na praza Juan Salgueiro de Silleda. No mesmo escenario, celebrarase a festa de fin de ano en Noitevella, animada por DJ Kintana.

Silleda volverá a despedir o ano na xornada do 31 coa carreira de San Silvestre, coorganizada con Trasdeza Trail, e a gala resumo anual con badaladas incluidas ao mediodía. As inscricións para a carreira están xa abertas en ccnorte.com no pavillón 1 do recinto Semana Verde, ca xa 24 edición do seu recoñecido Concerto de Nadal.

Papá Noel, Festa Infantil e os Reis Magos

A rapazada terá novamente dúas citas clave no Nadal de Silleda. O mércores 24, Papa Noel estará novamente recollendo as peticións na Casa do Concello, en horrio de mañá. E o día de Nadal, volverá percorrer as rúas da Bandeira, para rematar cunha chocolatada e recepción no Centro Cultural Vista Alegre. Para despedir o ano, os máis novos terán unha cita no pavillón municipal César G. Fares o martes día 30, cunha festa na que non faltarán inchables, animación e moitas sorpresas.

A Cabalgata de Reis o día 5 polas rúas de Silleda será outro dos momentos clave do programa.

Gastronomía, libros e choiva de premios de ECOS

A gastronomía, ademais do obradoiro de galletas para a rapazada tamén terá protagonismo. En Vista Alegre o xoves 18 haberá unha demostración culinaria

de pratos de Nadal. Tamén neste mesmo centro cultural se inaugura o día 17 a exposición de postais e o venres 19 terá lugar un obradoiro de adornos da man da ANPA Brincadeira.

Publicidade

Preme para contactar con nós e pregunta polas tarifas que son unha bicoca!

A campaña de ECOS tamén chega forte este Nadal, co sorteo do Calendario de Advento, do 1 ao 24 de decembro, a campaña do Roscón de Reis e o sorteo final de premios, que terá lugar o venres 9 de xaneiro.

Certames Vai de Parroquia e Silleda Fai Nadal

Ademais das actividades mencionadas, o Concello de Silleda ten en marcha a que é xa a quinta edición do certame #SilledaFaiNadal, no cal premiará ás mellores decoracións de Nadal do municipio nas categorías individual e colectiva, co reparto de máis de 3.500 euros en premios que consisten en vales para o comercio e a hostalería local. O prazo para participar está aberto ata o mércores día 3.

Así mesmo, tamén está xa en marcha unha nova edición do concurso Vai de Parroquias, que buscará un ano máis promocionar a riqueza cultural, natural, arquitectónica e artística das 33 parroquias que conforman Silleda, con destacadas novidades para fomentar a participación, baixo o lema “Misión elfos 33”. Todas as persoas que participen e completen as pistas entrarán no sorteo dunha estadía en autocaravana para 4 persoas.

Dende o Concello de Silleda agradécese a colaboración de todos os colectivos e a veciñanza con este programa, do que se irá dando conta con máis detalle de cada unha das actividades a través das diferentes canles de comunicación.