O goberno de España aproba axudas para o gasóleo agrícola e para a compra de fertilizantes

Establece unha subvención para o gasóleo de uso agrario de 0,20 céntimos por litro

Ecos da Comarca/Xeral

O real decreto-lei de medidas extraordinarias para facer fronte ás consecuencias da guerra en Irán, aprobado este venres polo Consello de Ministros, contempla liñas de apoio específicas para os sectores agrario e pesqueiro. Trátase dun potente paquete de axudas por un valor superior a 877 millóns de euros. Principalmente, establécese unha axuda directa a agricultores para a compra de fertilizantes, unha subvención de 20 céntimos por litro para a compra de gasóleo de uso agrícola e unha compensación económica para os buques pesqueiros polo incremento dos custos de produción.

O real decreto-lei contempla tamén axudas de acceso ao financiamento específicas para os sectores agroalimentario e pesqueiro (liña ICO-MAPA-SAECA) e, en materia fiscal, a exención durante tres meses da taxa da pesca. Ademais de beneficiarse das axudas xerais aprobadas ás que as empresas do sector agrícola e pesqueiro poidan ter dereito, o real decreto contén medidas específicas debido ao impacto que o conflito bélico ten xa no fluxo comercial das materias primas, e en particular no incremento dos prezos do petróleo, o gas e os fertilizantes. A agricultura, a gandería e a pesca constitúen un sector estratéxico para lle economía española e xoga ademais un papel esencial na seguridade alimentaria.

As medidas específicas contempladas son:

Axuda de 20 céntimos por litro para a adquisición de gasóleo agrícola

Prolongarase ata o 30 de xuño e os agricultores e gandeiros que teñan dereito a ela non terán que realizar ningún trámite adicional. Considerarase solicitada a axuda coa presentación da petición da devolución do imposto especial sobre hidrocarburos, do que están exentos os agricultores e gandeiros. Para financiar esta medida contémplase un orzamento de 52 millóns de euros.

 Publicidade

Preme para obter máis información.

Axuda para a adquisición de fertilizantes

Os fertilizantes son unha das materias primas que máis se encareceron polo conflito bélico e a medida trata de paliar o impacto deste incremento nas explotacións agrarias. O Goberno xa deu unha axuda similar tras a invasión rusa de Ucraína, pero nesta ocasión, a diferenza de entón, beneficiaranse non só aos agricultores que reciben axudas da Política Agraria Común (PAC), senón todos os que estean dados de alta nos rexistros de explotacións agrarias. O orzamento desta medida ascende a 500 millóns de euros.

Axuda para o acceso ao financiamento

O real decreto-lei amplía en 300 millóns de euros a liña de créditos ICO-MAPA-SAECA para o sector agroalimentario e pesqueiro, unha das medidas de apoio habilitadas tras a invasión rusa de Ucraína. O fondo para a subvención do principal dos créditos dótase con 225 millóns de euros, mentres que os 75 millóns restantes destínanse a sufragar os avais da Sociedade Estatal de Caución Agraria (SAECA) necesarios para a obtención dos créditos.

 PUBLICIDADE

Preme na imaxe para contactar con nós!

Axuda compensatoria para a frota pesqueira

O incremento dos prezos da enerxía tamén repercute no sector pesqueiro, tanto o directo polo prezo do combustible, como a súa incidencia noutros custos de produción como os envases para a conxelación do peixe. Ademais, o peche dos espazos aéreos dificulta a rotación das tripulacións dos barcos españois que faenan en augas internacionais. A axuda compensatoria para cada buque determinarase en función do seu consumo diario de combustible, custo semanal deste e os días de actividade. Ademais, teranse en conta tamén as artes de pesca utilizadas e se opera en caladoiro nacional ou internacional. O orzamento inicial para esta axuda é de 25 millóns de euros.

Exención da taxa sobre pesca fresca

Esta medida para a frota pesqueira estará en vigor ata o 30 de xuño.