O BNG subliña que a tarifa de 6,40 € entre Lalín e Santiago pola AP-53 é "discriminatoria e abusiva"

"Crespo trata de utilizar partidistamente a indignación pola suba desta cando sempre acatou submisamente as decisións do PP que son os responsables desta situación", sinala

Ecos da Comarca/Deza

O BNG considera que a tarifa de 6,40 euros entre Lalín e Santiago pola AP-53 é "discriminatoria, abusiva e indicente". E culpa ao alcalde lalinense, José Crespo, de "tratar de utilizar partidistamente a indignación pola suba desta cando sempre acatou submisamente as decisións do PP que son os responsables desta situación".

Para o BNG o custo deste tramo é "absolutamente desproporcionado" e recorda que "mentres noutros territorios do Estado, principalmente Madrid, o goberno rescata ate oito tramos de autoestradas das radiais da capital, de iniciativa privada, e que pasamos a pagar todos, na AP-53 o custo, máis que agravado, recae nos usuarios".

"Analizando a traxectoria do P.P. sobre a xestión das autoestradas de Galiza, non é serio que agora do señor Crespo desde a alcaldía de Lalín pretenda abandeirar a causa contra esta estafa das abusivas tarifas. Trata o señor Crespo de buscar o apoio dos sectores máis directamente prexudicados, aos que trata de sumar a súa causa partidista. Os prexudicados son sectores que terán un lastre máis na súa actividade económica e consecuentemente prexudicará a todos os veciños da comarca", recalca.

E sinala que "sobran argumentos para a indignación e oposición radical a este atraco. Pero a señor Crespo debe facer memoria sobre a posición do seu partido cando goberna en Madrid. Deber recorda que Aznar prorrogou a concesión da Autoestrada do Atlántico -cando estaba remata a concesión- a unha empresa ate o 2048, e que rexeitou as proposta do BNG sobre o transferencia tanto da autoestrada do Atlántico como da AP-53 á Xunta de Galiza, tal como agora manifesta que sería o oportuno. Certo é que en canto ao rescate de

autoestradas en Galiza para que sexan de carácter público e gratuíto, como en moitos outros territorios do Estado, non hai gran diferencia entre PP e PSOE-UP".

Erro de facer comparativas

E insiste en que "mais non podemos caer no erro de facer comparativas con outras autoestradas como se a AP-53 estivera nas mesmas condicións. Lembrar que é a única vía de cobro que non ten rebaixa para os usuarios habituais, que no seu día a Xunta aportou 60 millóns de euros para a súa construción cando non é da súa competencia, ou como non facer especial fincapé no que se ven comprobando nos últimos anos, principalmente no treito da autoestrada que comunica Santiago e Lalín, que a circulación por esta vía de alta capacidade en días chuviosos encerra unha perigosidade que debe de ser resolta con urxencia. En xornadas de chuvia, máis ou menos cuantiosa, o carril dereito da marcha en ambos sentidos non é capaz de drenar correctamente a auga, polo que se forman importantes acumulacións e pozas que dificultan a circulación e poñen en perigo os condutores. É por iso polo que en días chuviosos resulta habitual comprobar como os vehículos circulan polo carril esquerdo para evitar a auga e a perigosidade do denominado “aquaplanning”, ocupando deste xeito un espazo reservado para adiantamentos".

Ademais, subliña que "circular polo carril dereito cando está anegado detrás doutro coche tamén dificulta seriamente a visibilidade debido á auga que libera o coche precedente, o que constitúe outro claro factor de risco para que se produza un accidente. Son moitos os usuarios que veñen demandando unha solución a esta cuestión sen que polo de agora se tomaran medidas por parte das administracións competentes para acabar coa problemática nunha estrada que é de pago, cunhas tarifas excepcionalmente elevadas, e na que, polo tanto, a seguridade debería estar totalmente garantida. Resumo: pagamos unha cifra indecente por un servizo que nin se presta nas condicións esixidas".

Preme na imaxe se queres contactar connosco!

Así mesmo, insiste en que "o señor Crespo solicita agora que AP 53 teña a mesma bonificación que a aplicada na AP 9. O que non explica Crespo é que esta bonifación foi resultado da acción política do BNG no Congreso dos Deputados, que cun só deputado conseguíu máis que todos os do PP e PSOE en décadas. Tamén tería que explicar Crespo a medida do BNG era o inicio do camiño para acadar o rescate das autoestradas galegas".

Ante todo isto, o BNG promete que vai traballar en beneficio dos veciños e dos sectores produtivo da comarca. "A redución das tarifas na AP-53 será positivas para a a comarca e para toda Galiza, xa que gran parte do tráfico con destino ou saída na Galiza central vai por esta vía, e se non o fai é pola súa exorbitada tarifa. Pero o BNG traballa con seriedade e con obxectivos claros. E o obxectivo é o rescate e gratuidade deste tramo. Se o señor Crespo se apunta benvido sexa!".