O BNG reclama reforzar a atención primaria en Deza e Tabeirós tras a sentenza pola morte dun paciente
Ecos da Comarca/Deza
O Grupo Parlamentar do BNG presentou unha proposición non de lei no Parlamento de Galicia para reclamar á Xunta un reforzo inmediato dos cadros de persoal dos centros de saúde e dos PAC das comarcas de Deza e Tabeirós-Terra de Montes.
A iniciativa, asinada polas deputadas Ariadna Fernández González, Iria Carreira Pazos e Montserrat Prado Cores, chega despois da recente resolución xudicial que condena o Servizo Galego de Saúde pola morte dun paciente no PAC da Estrada en agosto de 2018. A sentenza recoñece unha “perda de oportunidade” para o doente e sinala deficiencias na atención recibida, ao falecer sen chegar a ser atendido por un médico. A familia recibirá unha indemnización de 300.000 euros.
Segundo lembra o BNG, no momento dos feitos un dos facultativos non se presentou á quenda de garda ao aceptar cubrir un reforzo en Vilagarcía, mentres que o outro se atopaba atendendo unha urxencia fóra do PAC cando chegou o paciente.
PUBLICIDADE
Os nacionalistas consideran que a resolución xudicial volve poñer sobre a mesa as carencias de persoal na sanidade pública e advirten de que “esta problemática non se limita ao caso da Estrada”. No documento presentado ante o Parlamento sinalan dificultades para cubrir prazas de medicina de familia, especialistas e persoal sanitario en distintos puntos de Deza e Tabeirós-Terra de Montes.
En concreto, mencionan as dificultades de cobertura e a sobrecarga asistencial denunciadas en Lalín e Silleda, así como a redución de prestacións e as carencias de atención pediátrica en determinadas quendas nos centros de saúde de Agolada, Rodeiro e Dozón. Tamén aluden ás deficiencias existentes no centro de saúde de Vila de Cruces, que foron trasladadas recentemente ao Parlamento.
A iniciativa do BNG incorpora ademais outro caso xudicial relacionado coa asistencia sanitaria en Lalín, favorable á familia dun paciente falecido. Segundo expón a formación, naquela resolución puxéronse de manifesto eivas na valoración do doente e unha prolongada espera antes do seu regreso ao domicilio, para posteriormente regresar ao centro de saúde e falecer por un infarto.
Seis medidas para reforzar a sanidade
Ante esta situación, o BNG insta a Xunta a adoptar seis medidas. Entre elas figura o reforzo inmediato dos cadros de persoal dos centros de saúde e PAC do Deza e Tabeirós-Terra de Montes, así como garantir a cobertura efectiva de vacantes, baixas, permisos e ausencias.
PUBLICIDADE
Tamén reclama que os PAC conten con persoal médico suficiente para evitar que ningún paciente quede sen valoración médica cando precise atención sanitaria.
A proposición inclúe especificamente os centros de saúde de Lalín, Silleda, A Estrada, Forcarei, Vila de Cruces, Agolada, Rodeiro e Dozón, nos que pide reforzar a atención primaria atendendo ás necesidades de cada zona.
O BNG reclama igualmente garantir as quendas e servizos de pediatría correspondentes nos centros de saúde da comarca e que a Xunta dea conta no Parlamento das medidas adoptadas e dos novos recursos humanos incorporados aos centros de saúde e PAC, con especial atención ao caso da Estrada.
Comentarios