O BNG reclama axudas extraordinarias para as explotacións afectadas pola seca en Deza-Tabeirós

Ecos da Comarca/Deza

O Grupo Parlamentar do BNG levou ao Parlamento galego unha proposición non de lei para reclamar á Xunta unha resposta específica ante os efectos que a seca está a provocar no sector agrogandeiro das comarcas do Deza, Tabeirós e Terra de Montes.

A iniciativa, asinada polas deputadas Ariadna Fernández González, Sonia Vidal Lamas e Montserrat Valcárcel Armesto e polos deputados Secundino Fernández Fernández e Luis Bará Torres, alerta de que a falta de precipitacións acumulada nas últimas semanas, xunto coas elevadas temperaturas, está a deteriorar de maneira importante as condicións produtivas das explotacións.

Segundo sinala o BNG, o problema vai máis alá da falta de auga para o consumo das granxas. A seca está a provocar tamén unha importante escaseza de alimento para o gando e pode comprometer as reservas necesarias para os próximos meses, debido á redución da produción de herba, millo forraxeiro e outros cultivos destinados á alimentación animal.

A formación nacionalista advirte de que algunhas explotacións, especialmente as de carácter extensivo, xa están a recorrer de maneira anticipada ás reservas almacenadas ou se están vendo obrigadas a adquirir forraxes no exterior. Unha situación que, segundo explican, incrementa os custos de produción e reduce as marxes económicas das explotacións.

 PUBLICIDADE

Preme na imaxe para obter máis información deste evento.

O BNG considera especialmente preocupante a situación nunha comarca cunha importante presenza de explotacións de vacún de leite e de carne, ao tempo que apunta a que a seca, as altas temperaturas, determinadas pragas e os danos provocados polo xabaril están agravando o estado dos cultivos destinados ao ensilado e á alimentación animal.

A formación nacionalista fala dunha "crise forraxeira de importantes dimensións" que pode ter consecuencias directas sobre a viabilidade económica das explotacións e sobre a continuidade da actividade agrogandeira no territorio.

Cinco medidas reclamadas á Xunta

A proposición non de lei insta o Goberno galego a realizar de maneira inmediata unha avaliación específica dos danos provocados pola seca no sector agrogandeiro do Deza, Tabeirós e Terra de Montes, analizando o impacto sobre prados, pastos, millo e demais cultivos destinados á alimentación animal.

Tamén reclama a elaboración dun mapa das explotacións afectadas, no que se cuantifique a redución da produción de forraxe e as necesidades de alimentación previstas para os próximos meses.

 PUBLICIDADE

Preme na imaxe para obter máis información do evento.

Entre as medidas propostas figura igualmente a creación dunha liña extraordinaria de axudas directas para compensar as perdas de produción e o incremento dos custos derivados da compra de forraxes e alimentos para o gando.

O BNG pide, ademais, axudas específicas para a adquisición e transporte de forraxes, co obxectivo de garantir o abastecemento das explotacións que non conten con reservas suficientes para afrontar os próximos meses.

Finalmente, a iniciativa reclama incrementar os investimentos públicos destinados á creación e mellora de pequenas infraestruturas de almacenamento de auga para uso agrogandeiro, especialmente nas zonas rurais máis vulnerables fronte á seca.

 PUBLICIDADE

Preme na imaxe se queres contactar connosco.

Desde o BNG consideran que a resposta das administracións non debe limitarse a actuar cando a situación xa sexa de emerxencia e defenden avanzar cara a unha maior planificación e adaptación do sector primario ás novas condicións climáticas. A formación sinala que a seca deixou de ser un fenómeno excepcional e se converteu nun risco recorrente que require medidas de prevención e planificación a medio e longo prazo.