O BNG reclama ao Concello de Silleda que informe da nova liña de alta tensión A Estrada-Paizás
Ecos da Comarca/Silleda
O BNG de Silleda reclama ao Goberno municipal que actúe ante o proxecto dunha nova liña de alta tensión de 66 kV que conectará a subestación eléctrica da Estrada coa de Paizás, en Silleda, e que afectará a veciñanza de distintas parroquias do municipio.
Para o BNG, máis alá das características técnicas do proxecto, "o que resulta especialmente preocupante é a falta de información e iniciativa por parte do Concello de
Silleda ante unha actuación que afecta directamente ao seu territorio e á súa veciñanza".
A formación nacionalista considera especialmente significativa a diferenza coa resposta
dada polo Concello da Estrada. "O goberno estradense xa anunciou a convocatoria de
reunións coas persoas afectadas das 14 parroquias para explicar o proxecto e acompañalas durante o período de alegacións, ofrecendo ademais asesoramento
gratuíto e modelos de alegación elaborados cunha empresa especializada".
PUBLICIDADE
De feito, esta mesma semana veciños e veciñas de Dornelas, apunta o BNG, desprazáronse a Loimil, onde participaron nunha reunión informativa coa presenza do tenente de alcalde da Estrada, Alberto Blanco, acompañado por persoal técnico da empresa contratada polo concello para prestar asesoramento. “Mentres na Estrada o concello estea reunindo á veciñanza, explicándolle o proxecto e poñendo medios para que poida presentar alegacións, en Silleda non se estea facendo absolutamente nada, como xa nos ten acostumados este goberno”, sinala a portavoz Erea Rey.
Desde a formación consideran que o Concello de Silleda debe adoptar unha posición activa e informar canto antes ás parroquias afectadas, explicando o alcance do proxecto, os posibles impactos e os prazos existentes para presentar alegacións.
PUBLICIDADE
O BNG reclama tamén que o Goberno municipal poña á disposición da veciñanza os medios técnicos e xurídicos necesarios para que as persoas afectadas poidan coñecer
os seus dereitos e participar no procedemento con todas as garantías. “A veciñanza de Silleda non pode quedar atrás nin ter menos información ou menos apoio simplemente porque o Concello non actúe; se existe un proceso de alegacións aberto e hai persoas afectadas no noso municipio, o concello ten a responsabilidade de informar, acompañar e defender os intereses da veciñanza”.
O BNG pide, polo tanto, que o Goberno municipal convoque reunións informativas nas parroquias afectadas, facilite acceso á documentación do proxecto e explique publicamente cal vai ser a posición do Concello ante esta nova infraestrutura. Para o BNG, a transparencia e a participación veciñal deben ser unha prioridade desde o primeiro momento, especialmente cando se trata de proxectos de infraestrutura que poden ter incidencia directa sobre propiedades, explotacións e o territorio das parroquias de Silleda.
Comentarios