O BNG propón unha comisión municipal para afrontar os “preocupantes indicadores económicos” de Lalín

Mari Fernández urxe ao goberno do PP a “sentarnos, analizar os datos e poñer solucións enriba da mesa”

Ecos da Comarca/Lalín

O BNG de Lalín considera, á vista dos últimos datos de indicadores económicos relativos ao concello e publicados polo Instituto Galego de Estatística (IGE) que “urxe desde o Concello facer unha análise rigorosa dos datos e estudar a posta en marcha de medidas dentro das competencias locais para paliar os preocupantes indicadores económicos que arrastra en cada estatística o noso concello”.

A responsable local, Mari Fernández Sanmartín, advirte diante das cifras oficiais que “nun momento como o actual de aumento do IPC, co custe da vivenda disparado e a incerteza económica global, un goberno responsable non pode facer deixazón de funcións”. O BNG de Lalín “ten feitos os deberes”, asegura Fernández Sanmartín, “e pedimos que o goberno do PP afronte a realidade e o futuro da nosa veciñanza e conforme unha comisión municipal ou unha mesa de traballo coa representación de todos os grupos para analizar con seriedade a situación económica do noso concello e procurar solucións que axuden de verdade á veciñanza”.

 PUBLICIDADE

Para o BNG de Lalín é “inasumible” que a renda bruta por habitante no concello sexa 4.133 euros anuais por debaixo da media galega, e mesmo case 300 euros por debaixo

da media da comarca. "Segundo os últimos datos do IGE as veciñas e veciños de Lalín

teñen unha renda bruta por habitante de 15.920 euros, fronte aos 19.053 da media

galega e aos 16.213 da media da Comarca do Deza, onde Rodeiro e Silleda colócanse á

cabeza de renda bruta por habitante".

Destaca Mari Fernández Sanmartín que “con estas rendas medias tan baixas, a veciñanza de Lalín ten que facer fronte a alugueiros de vivendas entre os máis caros do país e ao incremento de prezos de combustíbeis e da cesta da compra que está a provocar de xeito desbocado o panorama xeopolítico mundial e a guerra ilegal na que estamos inmersos”. Hai un par de días se coñecía o último dato adiantado do IPC, cun encarecemento do prezo da vida dun 3,3%, “o BNG non entende que o goberno municipal do PP permaneza impasible -igual que está a facer o goberno de Rueda na Xunta- agardando que outros adopten solucións para a cidadanía”.

Sentarse e arremangarse

“Hai moitas cousas que pode e debe facer un goberno municipal responsable”, asegura Fernández Sanmartín, “e non son precisamente aumentar a débeda da veciñanza e

subirlles as taxas e impostos”. O BNG de Lalín “exixe actuar”, e cos datos sobre a mesa e o traballo feito “pedimos ao goberno do señor Crespo que se sente e se arremangue” creando unha comisión ou mesa municipal “na que todos podamos estudar a situación e

poñer sobre a mesa políticas e medidas para que esta nova crise que se aveciña non se

cebe coa veciñanza de Lalín”.

 Publicidade

Preme para obter máis información.

Destaca Fernández Sanmartín que “é urxente afrontar a situación e ter un plan de futuro, é o que ten que facer un goberno municipal responsable”. A responsable local do BNG demanda a Crespo “que poña día, hora e lugar para empezar a traballar todos xuntos antes de que os efectos económicos provoquen na veciñanza de Lalín situacións de

emerxencia social que o goberno do PP non vai poder afrontar”. Desde o BNG de Lalín “temos preparada unha batería de políticas que poden desde xa empezar a poñer solución a un problema que leva anos aumentando mentres o goberno do PP mira cara

outro lado”.