O BNG insta á modificación do PXOM para solucionar os erros na parcela do actual albergue da Bandeira

Ecos da Comarca/Silleda

O Bloque Nacionalista Galego de Silleda esixe ao goberno local que poña fin "á súa estratexia de marear a perdiz" e proceda de inmediato a devolver o terreo do albergue de A Bandeira nas condicións nas que foi cedido, respectando a súa titularidade privada e a súa cualificación urbanística orixinal.

“É inadmisible que, logo de ceder de boa fe e gratuitamente un terreo para un uso público,

unha veciña de Silleda se vexa obrigada a iniciar un procedemento xudicial para recuperar o que é seu” recalca a voceira, Erea Rey, que engade que “a alcaldesa debería sentir vergoña política e por permitir que esta situación chegase ata este punto, obrigando a unha cidadá a gastar tempo e cartos en defender un dereito tan básico como é a súa propia propiedade”.

Publicidade

Preme na imaxe para obter máis información do evento.

Neste sentido, "desde o BNG queremos recordar que a problemática entorno ao albergue non xorde pola petición da lexítima propietaria, senón pola mala acción da alcaldesa, que asinou un convenio sen garantías e porque permitiu que se alterase a cualificación urbanística do terreo, o que motivou que a propietaria tivera que tomar accións xudiciais para defender o seu interese". Este caso, sinala, "pon en evidencia unha falla grave na xestión municipal, que vai máis alá dun conflito puntual". Por iso, desde o BNG instan ao Concello de Silleda a revisar de inmediato todos os convenios de cesión de terreos actualmente vixentes, asegurando que quede expresamente estipulado:

• Que non se poderá modificar a cualificación urbanística das parcelas cedidas sen o consentimento expreso dos propietarios.

•  Que en ningún caso se alterará a titularidade privada dos terreos, que deberán seguir

figurando como tales no planeamento urbanístico.

Publicidade

Preme na imaxe se queres contactar connosco.

"Non se pode permitir que quen colabora co interese xeral, ceda un terreo gratuitamente e sen ánimo de lucro, acabe sufrindo prexuízos legais, administrativos e económicos por culpa da desidia ou da manipulación institucional. Desde o BNG reclamamos unha solución inmediata para o caso do albergue de A Bandeira e unha política clara de respecto e garantía da propiedade privada nos convenios de cesión existentes e futuros".