O BNG exixe nunha visita a Deza medidas urxentes para frear a baixada do prezo do leite

Ana Pontón advirte de que as empresas leiteiras anuncian recortes de seis céntimos por litro na renovación dos contratos

Ecos da Comarca/Rodeiro

A portavoz nacional do Bloque Nacionalista Galego, Ana Pontón, acompañada pola eurodeputada Ana Miranda, participou este sábado na charla informativa na comarca de Deza para explicar ás e aos gandeiros como afectará o tratado de Mercosur á súa actividade e cal é o posicionamento que mantivo o Bloque na defensa do sector. Tamén estivo acompañada da deputada pola comarca Ariadna Fernández e responsables da organización no Deza. Realizaron unha visita á comarca para coñecer de primeira man a situación do sector lácteo. 

A eurodeputada Ana Miranda asegurou que “seguiremos defendendo o noso sector agrograndeiro fronte ao Acordo UE-Mercosur, tan lesivo para o sector cárnico”, e subliñou que, por ese motivo, “nas xornadas que hoxe estamos facendo en Rodeiro e que levaremos por todo o país, estamos explicando verdadeiramente quen é quen e como votaron o PP e o PSOE”, aos que acusou de “estar vendendo o sector”.

A primeira hora da mañá, a comitiva nacionalista estivo na Cooperativa Agraria "O Rodo" e en Gandería Pereirón, onde Pontón agradeceu a Héctor a súa acollida destacando esta explotación como "un exemplo de calidade e bo facer do noso sector, unha das moitas que fan que Galiza produza o 42% do leite fresco de todo o Estado".

  Publicidade

Preme na imaxe para obter máis información do evento.

Con todo, a líder nacionalista alertou da "inxustiza inaceptable" que sofren as produtoras e produtores galegos. "A pesar desa calidade excepcional, o prezo do leite en Galiza volve estar por debaixo da media. De feito, en 2025 fomos a comunidade co prezo máis baixo de todo o Estado", denunciou. Pontón preguntouse retoricamente por que ocorre isto cando ademais o Estado español consume máis leite do que produce, polo que "non hai saturación do mercado", e criticou duramente a pasividade do goberno de Rueda: "Mentres os gandeiros reciben o peor prezo, a Xunta desenténdese e mira cara outro lado".

A situación pode agravarse nas vindeiras semanas. "A información que nos traslada o sector é que as empresas leiteiras están a comunicar aos gandeiros que a renovación dos contratos a partir de marzo se vai facer á baixa, cun recorte de seis céntimos ou máis por litro. Isto afondaría no prexuízo que soportan as nosas explotacións", alertou Pontón.

  Publicidade

Preme para obter máis información.

Ante esta "emerxencia", o BNG pon sobre a mesa medidas concretas. A primeira é convocar de inmediato á industria e aos produtores nunha mesa para poñer fin a uns prezos que ano tras ano sitúan o leite galego á cola do Estado. A segunda pasa por propoñer unha distribución das axudas que protexa ás pequenas e medianas explotacións, "que son a inmensa maioría e as que fan posible un rural vivo". E a terceira medida é poñer en marcha un plan para mobilizar 100.000 hectáreas de aquí a 2030, co obxectivo de ampliar a superficie das explotacións, aumentar a produción de pastos e forraxes e mellorar as axudas da PAC que reciben.

 Publicidade/DOAZÓN PARA ECOS DA COMARCA

Fai unha doazón para axudar ao xornalistmo independente. Gracias!

 "Coidar e apoiar ao noso sector leiteiro é fundamental desde todos os puntos de vista: económico, social e ambiental. É unha peza esencial para manter un rural vivo, coidado e con futuro. Non podemos esquecer que o 90% do territorio é rural e acolle ao 40% da poboación. Polo tanto, Galiza non se pode entender sen o rural", concluíu Pontón.