O BNG esixe á Xunta e ao Concello solucións inmediatas para o CEIP Nosa Señora da Piedade

Álex Fiúza reclama que se deixe de “parchear” o centro e denuncia que, co curso xa iniciado e con máis aulas de Infantil, as familias seguen sen unha solución para unhas instalacións que levan anos presentando deficiencias

Ecos da Comarca/Vila de Cruces

O portavoz municipal do BNG de Vila de Cruces, Álex Fiúza, esixe á Xunta de Galicia e ao

Goberno municipal que deixen de adiar a solución ás graves carencias do CEIP Plurilingüe

Nosa Señora da Piedade e adopten, dunha vez por todas, unha actuación integral que

garanta unhas instalacións dignas, seguras e adecuadas para o alumnado. “Estamos ante un problema perfectamente coñecido desde hai anos, non ante unha situación imprevista. En marzo a propia Xunta recoñeceu que había que estudar unha solución estrutural, pero o curso xa comezou e as familias seguen sen esa solución”, denuncia Fiúza.

O portavoz nacionalista considera especialmente grave que se chegue ao inicio do curso

2026-2027 sen ter resolto unha situación que xa provocou preocupación e reclamacións por parte das familias e da comunidade educativa. Ademais, o número de aulas de Educación Infantil aumenta este curso, o que fai aínda máis evidente a necesidade de contar con espazos suficientes e axeitados.

“Non podemos aceptar que cada ano se repita a mesma historia: chega o inverno, aparecen as humidades, as goteiras e os problemas derivados dun edificio que necesita unha actuación de fondo”, comenta o portavoz do BNG. Fiúza lembra que o pasado mes de marzo a Consellería de Educación anunciou que estudaría dúas alternativas: ampliar o edificio de Primaria ou acometer unha reforma integral do edificio de Infantil. Porén, meses despois, coa actividade lectiva xa iniciada, a comunidade educativa continúa sen coñecer unha solución definitiva nin un calendario concreto para executala.

 PUBLICIDADE

Preme na imaxe para obter máis información do evento.

O BNG considera especialmente preocupante afrontar agora a chegada do outono e da época de choivas sen ter resolto de maneira estrutural os problemas do edificio de Infantil. “As crianzas de Infantil non teñen por que pagar a falta de planificación da Consellería. Mentres os responsables da Xunta poden seguir traballando desde despachos perfectamente acondicionados, aquí estamos falando de nenos e nenas pequenos que merecen entrar nun colexio sen ter que convivir con goteiras, humidades ou instalacións deficientes. Os señoritos da Consellaría poden permitirse esperar; as familias das Cruces, non”, afirma Fiúza.

O portavoz do BNG tamén responsabiliza directamente o Goberno municipal de Vila de Cruces da situación, pola súa falta de capacidade e de presión política para conseguir unha solución definitiva. “O Concello non pode limitarse a acompañar as reclamacións das familias ou a emitir comunicados cando o problema se fai público. O Goberno municipal ten que plantarse diante da Xunta e esixir unha solución, poñer todos os medios municipais á disposición do centro e defender os intereses das familias de Vila de Cruces”, reclama.

Fiúza considera especialmente preocupante que, mentres a Xunta e o Concello intercambian responsabilidades, quen queda no medio son as familias e o alumnado. “Isto non pode ser a resposta dunha administración educativa nin dun Goberno municipal”, denuncia. O BNG lembra que leva anos reclamando unha reforma integral do CEIP Nosa Señora da Piedade, incluíndo a creación de novos espazos, a mellora das instalacións de Infantil, a adaptación ás necesidades de matrícula, a creación de zonas cubertas para o alumnado e unha solución eficiente e racional para as instalacións do centro.

“Non queremos máis anuncios, máis fotografías nin máis parches. Queremos un proxecto, un orzamento e un calendario de execución. E queremos que se diga ás familias de Cruces cando e como se vai solucionar definitivamente o problema do colexio”, reclama Álex Fiúza.

 PUBLICIDADE

Preme na imaxe para contactar connosco.

O BNG esixe así á Xunta que concrete inmediatamente a alternativa escollida para o centro, reserve os recursos económicos necesarios e fixe un calendario de actuación, e ao Goberno municipal que exerza a súa responsabilidade e manteña unha presión política efectiva ata conseguir esa solución.

“As familias de Vila de Cruces non están pedindo ningún privilexio. Están pedindo algo tan

básico como que os seus fillos e fillas poidan estudar en condicións dignas, seguras e

adecuadas. Iso debería ser unha prioridade para a Xunta e tamén para o Concello”, conclúe o portavoz municipal do BNG.