O BNG esixe “ medidas de seguridade” no Lalín Arena

Mari Fernández desvela que o Concello de Lalín vén de ser condenado por un accidente dunha usuaria da piscina destas instalacións públicas

Ecos da Comarca/Lalín

O BNG de Lalín vén de recoller as queixas continuadas dos usuarios das piscinas e o SPA do Lalín Arena pola falta de medidas axeitadas de seguridade. "Foron máis dun cento os usuarios e usuarias destas instalacións que reclamaron por escrito durante máis dun ano ao Concello medidas antiesvaradías na zona de paso entre a piscina e o SPA. Lonxe de escoitar á veciñanza, o Concello de Lalín mesmo desestimou a reclamación de responsabilidade e adopción de medidas que demandou unha usuaria logo de caer nesta zona e sufrir importantes lesións de nocello e xeonllo", recalca o Bloque.

O BNG de Lalín vén de coñecer unha sentencia condenatoria ao Concello e a “anulación” por vía xudicial da decisión do goberno local de desestimar as reclamacións desta veciña.

Desde o BNG local consideran “irresponsable e temeraria” a actitude dun goberno do PP que “diante dos feitos e de escritos de queixas asinados por máis dun cento de usuarios e usuarias desatende e rexeita as demandas da veciñanza”. A responsable local do BNG, Mari Fernández Sanmartín recrimina ao goberno do PP “a súa desidia” diante das queixas da veciñanza que “quere usar as instalacións municipais pero se sinte insegura e atopa sempre o non por resposta do Concello”.

 Publicidade/DOAZÓN PARA ECOS DA COMARCA

Para o BNG non é de recibo que a solución adoptada por parte do goberno, diante destas

queixas e condena xudicial, sexa un mero parche que consiste na colocación dunhas bandas antiesvaradías. A nacionalista, Mari Fernández, denuncian que “no canto de escoitar á cidadanía para mellorar os servizos municipais”, o que está a facer sistematicamente o goberno do PP é “mirar cara outro lado, negarse a asumir as súas responsabilidades e manter situacións de perigo en instalacións que deberían ser espazos de ocio seguros e fiables para os usuarios e usuarias”.

 Publicidade

Preme na imaxe para obter máis información.

Logo da sentencia xudicial condenatoria da que o BNG tivo coñecemento, Mari Fernández Sanmartín agarda que “remate a soberbia aos veciños por parte do goberno do PP”. Ademais desde o BNG de Lalín avisan que “estaremos moi vixiantes para facer que se cumpran as obrigas en materia de seguranza en todos os servizos municipais”. Critica a responsable nacionalista que “non pode ser que un goberno local asuma sen preocuparse situacións de perigo denunciadas pola veciñanza e ratificadas mesmo vía xudicial”.

Publicidade

Preme para contactar con nós e pregunta polas tarifas que son unha bicoca!

Fernández Sanmartín lémbralle ademais ao goberno do PP que “entra nas súas competencias e responsabilidade garantir a seguranza de todas as instalacións públicas”,

unha responsabilidade que no caso do Concello de Lalín “debería mesmo ser maior sabendo que moitos dos usuarios destas instalacións son persoas maiores”.