O BNG denuncia que Taboada se preocupe máis pola foto do cambiador ca por manter digno o ambulatorio
- ecosdacomarca
- hace 3 minutos
- 2 min de lectura
Ecos da Comarca/Vila de Cruces
O BNG de Vila de Cruces considera que a instalación dun cambiador para bebés no servizo de Pediatría, anunciada polo goberno municipal poucas horas antes do pleno no que os nacionalistas levaban máis de 600 sinaturas reclamando melloras para o centro de saúde, "evidencia o oportunismo político do alcalde, Luis Taboada".
PUBLICIDADE
Para o portavoz do BNG, Alex Fiúza, resulta significativo que o Concello "correse a instalar un cambiador cando viu que a presión social das familias ususarias e o traballo desenvolvido polo BNG estaban poñendo o foco nas carencias do centro de saúde". Os nacionalistas lembran que esta é unha reivindicación que levan anos defendendo, tanto mediante iniciativas institucionais como coa campaña de recollida de sinaturas.
Con todo, desde o Bloque consideran que "o máis preocupante é que, mentres o goberno municipal busca unha fotografía para anunciar unha actuación puntual, continúa sen prestar atención a cuestións tan básicas como o mantemento e a conservación dun edificio sanitario".
Ao remate do pleno, Alex Fiúza e a concelleira Carlota Salgado achegáronse ao centro de saúde para comprobar a instalación do cambiador e denunciar o estado no que se atopan algunhas dependencias. Alí puideron comprobar que as ventás da consulta de Pediatría continúan coa escuma da decoración de Nadal colocada hai máis de sete meses e cun evidente estado de sucidade, sen que fosen limpadas desde entón, polo que decidiron retirala e limpar eles mesmos esa zona. "É unha imaxe que fala por si soa. Nun centro de saúde non abonda con colocar un cambiador para facer unha nota de prensa. O primeiro é garantir unhas instalacións limpas, coidadas e dignas para as crianzas, as familias, os profesionais e o conxunto da veciñanza", sinalan desde o BNG.
PUBLICIDADE
Os nacionalistas quixeron deixar claro que "esta denuncia non vai dirixida en ningún caso contra o persoal de limpeza nin contra os profesionais do centro de saúde, que desenvolven o seu traballo con dedicación e esforzo para ofrecer a mellor atención posible cos medios dos que dispoñen". Pola contra, consideran que "a responsabilidade de que un edificio sanitario conte cun mantemento adecuado e cunhas condicións dignas corresponde ás administracións públicas e, neste caso, tanto ao goberno municipal como ao Sergas, que deben velar por que os servizos públicos estean á altura do que merece a veciñanza".
PUBLICIDADE
"O problema non son as persoas que traballan no centro de saúde, senón quen ten a obriga de garantir que esas profesionais dispoñan dunhas instalacións limpas, ben conservadas e dignas. Non se pode presumir dun cambiador mentres se pasa por alto un estado de abandono que calquera usuario pode comprobar a simple vista", conclúen desde o BNG.
PUBLICIDADE
O BNG afirma que continuará defendendo melloras reais para o centro de saúde, porque "a humanización non consiste en facer anuncios de última hora nin en buscar unha fotografía, senón en garantir cada día un mantemento adecuado, unhas instalacións limpas e un servizo público de calidade para toda a veciñanza".
