O BNG denuncia a falta de persoal de apoio en centros educativos de Lalín

Esixe á Xunta solucións inmediatas

Ecos da Comarca/Lalín

O Bloque Nacionalista Galego denuncia a grave situación que están a padecer os centros públicos de ensino no concello de Lalín como consecuencia da falta de persoal de apoio e reclama á Xunta de Galicia a adopción de medidas urxentes que garantan unha educación pública de calidade e verdadeiramente inclusiva.

A formación nacionalista sinala que as mobilizacións da comunidade educativa en todo o país son un reflexo do deterioro do sistema de ensino público galego, onde alumnado, familias e profesorado levan tempo alertando da falta de recursos e da necesidade de

reforzar a atención ao alumnado con necesidades específicas de apoio educativo.

No caso concreto de Lalín, o BNG pon o foco nos centros CEIP Vicente Arias de la Maza e CEIP Varela Buxán, situados en Vilatuxe e Cercio, respectivamente, que dende o remate das vacacións de Entroido carecen do persoal suficiente para atender con garantías ao seu alumnado. Segundo denuncia a deputada Ariadna Fernández, “a existencia dun único coidador a media xornada compartido entre ambos centros resulta claramente insuficiente e impide garantir unha atención adecuada ao alumnado con necesidades específicas, vulnerando na práctica o seu dereito a unha educación inclusiva en igualdade de condicións”.

 PUBLICIDADE

Se queres obter máis información do evento preme na imaxe.

A organización nacionalista critica que esta situación se produza malia que a inspección educativa emitise informes favorables á creación das prazas necesarias. “Estamos ante

un novo exemplo dos recortes encubertos da Xunta no ensino público, que afectan

especialmente ao alumnado máis vulnerable”, advirten. O BNG considera inaceptable a inacción da Xunta de Galiza e alerta do risco de que esta situación se cronifique,

consolidando unha discriminación estrutural no acceso a unha educación de calidade.

 PUBLICIDADE

Preme para obter máis información.

Neste sentido, a formación anunciou a presentación de iniciativas parlamentarias para esixir responsabilidades e solucións inmediatas. En concreto, o BNG demandará á Xunta

a restitución urxente e estable do persoal de apoio necesario nestes centros, así como a

garantía de recursos suficientes para asegurar unha atención educativa digna e inclusiva, con igualdade de oportunidades e benestar para o alumnado con necesidades específicas de apoio educativo.