top of page

O BNG de Vila de Cruces reclama ao goberno local que dea un servizo completo da biblioteca municipal

Álex Fiúza propón a creación dunha bolsa de emprego municipal para cubrir as baixas que se xeneran nos servizos administrativos do Concello


Ecos da Comarca/Vila de Cruces

O BNG de Vila de Cruces demanda ao goberno local que ofreza un servizo completo da biblioteca municipal. "O servizo leva pechado case dous meses por causa dunha baixa laboral. O Concello en lugar de substituír a esa persoa para seguir mantendo o servizo, foi ó fácil pechando a biblioteca sen aportar solución", recrimina o partido nacionalista.

ree

O grupo de Álex Fiúza quere trasladar esta urxente demanda por parte da veciñanza ó goberno de Luís Taboada, "quen non está a resolver os problemas que se presentan, senón máis ben, prolongándoos no tempo", afirma.


Sinala que esta situación vense producindo dende finais de 2021. Dende o 13 de decembro non existe o servizo. Na porta da biblioteca figura un novo horario de 18:30 a 20:00, o cal se incumpre, pois algún día desta semana estivo pechada, tal e como asegura o BNG. "Trátase dun espazo de gran versatilidade, non só como lugar de préstamo. Moitos pais e nais agardan alí que as crianzas rematen as actividades lendo, mozas e mozos quedan na biblioteca para facer os deberes, traballos e demais. Moita xente utiliza a sala de informática ben pola conexión a internet ou ben para facer traballos de clase. É un espazo vital para moitas rapazas e rapaces. O servizo de préstamo pertence á Rede de Bibliotecas de Galicia e os usuarios están sendo sancionados, o que conleva non poder desenvolver actividade en bibliotecas doutras vilas pertencentes a esta rede", explica o BNG.


Ademais quere trasladar ao minigoberno que deberían ter informado desta situación a través dun bando municipal, "pois vivimos nun contexto rural no que se fan distancias de 10 quilómetros ou máis para ir á vila e as familias encóntranse coa porta da biblioteca pechada no momento en que chegan alí. Non é propio do correcto funcionamento dos servizos dunha vila, xa de por si escasa de espazos interiores de convivencia durante a maior parte do ano", conclúe.


Comentarios


IRS.gif
Copia de ¡TU Anuncio!.gif
Ecos_da_Comarca_neg.png

© 2025 por Ecos da Comarca.

¡Grazas por contactar connosco!

  • Facebook
  • Instagram
  • TikTok
  • X
  • Youtube
bottom of page