O BNG de Vila de Cruces presenta o plan “Todo queda nas Cruces”

Fiúza denuncia "a falta de acción do goberno local ante o peche continuado de negocios"

Ecos da Comarca/Vila de Cruces

O BNG de Vila de Cruces vén de denunciar a “inacción total” do goberno municipal ante a situación crítica do comercio local, marcada polo peche continuado de establecementos nos últimos anos. Segundo sinalan desde o BNG, “na última década desapareceron numerosos negocios na vila, deixando locais baleiros e unha perda evidente de dinamismo económico e social”.

A formación nacionalista critica que, mentres o comercio de proximidade perde peso e capacidade de competir, “o Concello non puxo en marcha ningunha estratexia seria nin medidas estruturais para frear esta sangría”. Neste contexto, o BNG presenta o plan “Todo queda nas Cruces”, unha proposta integral para reactivar o comercio e apoiar ás persoas autónomas e pequenas empresas do municipio.

Desde o BNG advirten de que a falta de relevo xeracional nalgúns negocios, a escasa dixitalización e a competencia das grandes superficies están a acelerar o declive do pequeno comercio. “Cada negocio que pecha é un golpe á economía local, pero tamén á vida das nosas rúas”, subliña Álex Fiuza, voceiro da formación política.

 PUBLICIDADE

Se queres obter máis información do evento preme na imaxe.

Ademais, lembran que existen liñas de axuda públicas —tanto da Xunta como da Deputación— que están a ser infrautilizadas por falta de acompañamento institucional. O plan presentado polos nacionalistas estrutúrase en catro eixos con medidas inmediatas e aplicables:

• Dinamización e eventos. Propoñen revitalizar os días de feira con actividades e

   incentivos ao consumo, así como campañas ao longo do ano e a utilización de

  locais baleiros como espazos comerciais efémeros.

• Fidelización e consumo local. O BNG aposta pola creación dunha Tarxeta Cliente “Cruces Activa”, un sistema de puntos e vantaxes acumulables por compras no

   comercio local que permita premiar a fidelidade da veciñanza con descontos,

   agasallos ou participación en sorteos periódicos. Esta medida complementaríase

   con campañas de promoción baixo o lema “Merca nas Cruces, Apóianos”.

• Dixitalización e modernización. Inclúe a creación dunha Oficina de Asesoramento Comercial que axude a captar axudas públicas —que poden acadar ata o 80-90% de financiamento en proxectos de modernización— e formación en ferramentas dixitais básicas para as persoas que xa posúen negocios.

• Infraestruturas e contorno urbano. Tamén propoñen a creación dunha bolsa de

   locais baleiros para facilitar a apertura de novos negocios.

 PUBLICIDADE

Preme para obter máis información.

“Ou se actúa agora ou será tarde”

Desde o BNG insisten en que a situación require medidas urxentes e planificación: “Non podemos seguir vendo como baixan as persianas sen que o Concello faga nada. Ou se actúa agora ou en poucos anos o tecido comercial de Cruces será residual”.

A formación reclama ao goberno local que "abandone a pasividade" e abra unha Mesa do Comercio e Hostalería para coordinar accións reais co sector. O BNG subliña que o plan é “perfectamente viable” desde o punto de vista económico, combinando fondos municipais con axudas doutras administracións, como o Plan Máis Provincia 2026. “Non é unha cuestión de recursos, é unha cuestión de vontade política”, conclúe Fiuza.