O BNG de Vila de Cruces denuncia "o abandono e a perigosidade das rúas do municipio"

Ecos da Comarca/Vila de Cruces

O Bloque Nacionalista Galego (BNG) de Vila de Cruces, a través do seu portavoz, Alex Fiuza, quere denunciar publicamente "o grave estado de abandono no que se atopan diversas rúas do municipio, unha situación que supón un risco evidente para a veciñanza".

Un exemplo claro desta problemática, apunta, "é a prolongación da rúa do Cine, onde as beirarrúas levan anos nun estado moi deficiente. Tal e como se pode observar, o pavimento presenta importantes fendas, afundimentos e zonas levantadas, cun evidente risco de desprendemento. Ademais, a presenza de maleza entre as xuntas evidencia a falta total de mantemento por parte do goberno municipal".

Segundo sinala o voceiro do BNG cruceño, Álex Fiúza, “esta situación non é nova, leva anos así sen que o Concello tome medidas efectivas para solucionala. Estamos a falar dunha zona transitada na que calquera persoa pode sufrir unha caída ou accidente”.

 PUBLICIDADE

Se queres obter máis información do evento preme na imaxe.

Desde o BNG advirten de que o deterioro progresivo da beirarrúa non só dificulta o tránsito, especialmente para persoas maiores ou con mobilidade reducida, senón que tamén pode derivar en danos maiores se non se actúa con urxencia.

O grupo nacionalista esixe ao goberno local que actúe de inmediato para reparar esta vía e garantir a seguridade da cidadanía. “Non se pode permitir que o espazo público estea neste estado. É unha cuestión de responsabilidade e de respecto pola veciñanza”, conclúe Fiuza.

 PUBLICIDADE

Preme para obter máis información.

O BNG de Vila de Cruces comprométese a seguir denunciando estas situacións e a traballar para que o Concello atenda as necesidades reais da veciñanza.