O BNG de Silleda denuncia "graves fallos na retransmisión do último pleno municipal"
- ecosdacomarca
- 27 jul
- 2 Min. de lectura
Ecos da Comarca/Silleda
O Bloque Nacionalista Galego de Silleda manifesta a súa profunda preocupación polos numerosos problemas técnicos rexistrados durante a retransmisión en directo do Pleno
municipal celebrado este xoves, día 24, a través da plataforma YouTube.
"Durante boa parte da sesión, o son non se transmitiu correctamente, con cortes constantes e momentos nos que directamente non se escoitaba nada. Ademais, as imaxes tampouco quedaron correctamente rexistradas, o que impide un seguimento completo e fiel do acontecido". Desde o BNG consideran "moi sospeitoso que estes supostos problemas coincidan precisamente co primeiro Pleno no que os seus concelleiros, Erea Rey e Xerardo Díaz, non levaron a súa propia cámara para gravar a sesión. “Agora, os veciños e veciñas de Silleda que queiran saber que se debateu, non poderán facelo a través da retransmisión oficial do Concello”, lamentan.
Publicidade
Os concelleiros nacionalistas critican tamén que "a alcaldesa non se preocupase por solucionar estes fallos durante o transcurso do Pleno, a pesar de ser coñecedora da situación polas queixas recibidas por parte de medios de comunicación que seguían a sesión desde as súas redaccións".
Desde o BNG lamentan que o Concello "non adique os mesmos medios nin esforzos a garantir unha retransmisión de calidade dos Plenos como si dedican a facer os vídeos de propaganda sobre a actividade da alcaldesa. Isto é unha mostra clara de falta de respecto do goberno local e do seu equipo de comunicación ao resto da corporación e ao seu traballo institucional”, afirman.
Publicidade
A portavoz do BNG de Silleda, Erea Rey, subliña que “o goberno debe garantir a calidade da retransmisión do debate plenario, por respecto ao traballo do resto de concelleiros e
concelleiras, pero tamén por respecto á veciñanza, que ten dereito a ver e escoitar o contido do debate”.
Comentarios