O BNG de Melide rexistra unha moción para a catalogación do Muíño de Furelos

O Bloque, no escrito dirixido a Medio Ambiente, solicita a suspensión e paralización, de xeito cautelar e temporal da obra a realizar na tosta do río Furelos aos efectos de estudo de alternativas

Ecos da Comarca/Melide

Este luns, 31 de agosto, o BNG de Melide rexistrou unha moción co obxectivo de que o Pleno Municipal se pronuncie sobre o inicio do expediente para a catalogación do Muíño sito na parroquia de Furelos (Melide), así como as súas infraestruturas asociadas como a tosta e a canle, coñecido actualmente como Muíño de Ludivina.

Muíño de Furelos. Autor: Museo Da Terra de Melide.

O pasado venres, a formación nacionalista celebrou unha asemblea para abordar este tema e, previo estudo de avaliación (técnica e legal) tomar unha postura ao respecto, co obxectivo de que calquera actuación na tosta estea fundamentada na prevalencia da mellora ambiental e ecolóxica e na calidade das augas do río Furelos, preservando tamén o valor etnolóxico e interese patrimonial da mesma.

O motivo fundamental de dar este paso obedece a que o Muíño de Ludivina non está catalogado nin figura como tal en ningún instrumento de planeamento municipal (NNSSMM/1994) nin autonómico (Plan Básico Autonómico). Tampouco está catalogado nin protexido pola Lei de Patrimonio Cultural de Galiza (LPCG/2016) xa que dita Lei unicamente outorga aos muíños un valor etnolóxico pero non os protexe directamente.

 PUBLICIDADE

Preme na imaxe para obter máis información deste evento.

A portavoz municipal, Ana Mosteiro, explica na moción que “o Muíño de Ludivina de Furelos axústase á tipoloxía tradicional dos muíños galegos, conserva de forma suficiente a súa integridade formal e construtiva e os aspectos característicos que determinan a súa autenticidade, polo que se lle recoñece un notable valor cultural como ben etnolóxico, que xustifica a súa inclusión no Catálogo do patrimonio cultural de Galiza”.

A formación nacionalista pretende con esta moción que Concello de Melide inste á Consellería de Cultura a incoar o procedemento para salvagarda e protección patrimonial de dito ben.

Ao mesmo tempo, o BNG de Melide tamén rexistrou hoxe un escrito semellante dirixido á Consellería de Cultura, Lingua e Xuventude. Neste caso, trátase dun escrito de dez páxinas cun anexo fotográfico no que se solicita: “A incoación, por parte da Consellería de Cultura, Lingua e Xuventude do expediente de incorporación ao Catálogo de Patrimonio Cultural de Galiza do Muíño de Ludivina ou Muíño da Ponte de San León situado na parroquia de Furelos (Melide) e súa infraestrutura asociada (tosta e gabia), de acordo co procedemento previsto nos arts. 26 e ss Lei 5/2016, de 4 de maio, do patrimonio cultural de Galicia”.

ESCRITO DIRIXIDO A MEDIO AMBIENTE

Pola súa banda, o BNG tamén acordou rexistrar este luns un escrito, independente da moción, dirixido á Consellería de Medio Ambiente e Cambio Climático coa seguinte petición:

“1.- A suspensión e paralización, de xeito cautelar e temporal  por parte da Consellería de Medio Ambiente e Cambio Climático, da execución da obra a realizar na tosta do río Furelos, dentro do proxecto de acondicionamento e mellora da conectividade da praia fluvial do río Furelos.

 PUBLICIDADE

Preme na imaxe para contactar connosco.

2.- Estudo e avaliación doutras posibles alternativas, tecnicamente viables, que, excluíndo, reducindo ou minimizando o impacto derivado da demolición de parte da actual tosta, teñan sempre como obxectivo principal a prevalencia dos valores ambientais do río Furelos, do seu caudal ecolóxico, da calidade (xeral e de baño) das augas e a preservación dos valores etnolóxicos e patrimoniais da tosta e da gabia, así como o conxunto da infraestrutura hidráulica do Muíño de Furelos”.

Ana Mosteiro agarda que desde o goberno da Xunta de Galicia se escoite a demanda da súa formación que persegue a “suspensión (e estudo de alternativas) que impidan a execución dun contrato que suporía a demolición efectiva dun tramo de 10m de tosta, de difícil ou moi complexa reversión”.

Lembramos que hoxe, 31 de agosto, ás 20:30 horas haberá unha concentradión diante do Consistorio de Melide para protexer a tosta de Don Antonio. Máis información: https://www.ecosdacomarca.com/post/melide-acolle-hoxe-31-de-agosto-unha-nova-concentraci%C3%B3n-en-defensa-da-presa-de-don-antonio