A Xunta destina 53.000€ para mellorar a iluminación e a xestión de residuos do polígono de Melide
A delegada da Xunta na Coruña comprobou o resultado das actuacións que permitiron reducir máis dun 70% o consumo eléctrico anual do seu alumeado público
Laura Moure/Melide
A delegada da Xunta na Coruña, Belén do Campo, xunto ao director territorial da Consellería de Economía e Industria, Isidoro Martínez, visitaron o parque empresarial da Madanela, en Melide, para coñecer o resultado das actuacións de mellora das súas infraestruturas, que contaron cunha achega autonómica de preto de 39.000 euros para a renovación da iluminación pública e outra de máis de 14.000 euros para mellorar a xestión dos residuos. En total, a Xunta destinou máis de 53.000 euros a estas intervencións, que xa están executadas.
O recinto empresarial ocupa unha superficie de 215.588 metros cadrados e alberga 86 empresas en funcionamento, polo que constitúe un dos principais espazos de actividade
económica da comarca da Terra de Melide.
Belén do Campo puxo en valor o resultado destas actuacións, que permiten avanzar na
eficiencia enerxética, mellorar a seguridade das instalacións e facilitar a recollida selectiva
de residuos. A delegada destacou a importancia de que os parques empresariais dispoñan de infraestruturas modernas, eficientes e adaptadas ás necesidades das empresas, contribuíndo así á competitividade da actividade económica local.
As intervencións enmárcanse na convocatoria de axudas de 2026 da Xunta para a habilitación e mellora das infraestruturas dos parques empresariais galegos, dotada con
3,5 millóns de euros e destinada a financiar actuacións que favorezan a modernización e a
sustentabilidade destes espazos.
Un aforro do 70 % no consumo eléctrico
Entre as actuacións xa realizadas destaca a renovación do alumeado público mediante a
substitución de 36 luminarias de vapor de sodio por outras de tecnoloxía LED, máis eficientes e regulables. Os traballos incluíron tamén a renovación de aproximadamente
1.800 metros de cableado deteriorado, a instalación de dúas columnas de iluminación de 12 metros de altura e a reparación e mellora dos cadros eléctricos de mando e protección.
En concreto, instaláronse 13 luminarias de 100 vatios, oito de 60 vatios e outras 15 de 50
vatios, adaptadas ás necesidades da instalación. O aforro se reflicte no consumo eléctrico
anual estimado, que pasa de 32.850 quilovatios hora a 9.785,65 quilovatios hora. Isto
supón unha redución do 70,21 %.
PUBLICIDADE
A intervención completouse coa renovación de distintos elementos dos cadros eléctricos, a
substitución dos interruptores diferenciais por modelos rearmables, a reparación das conexións internas, a mellora da estanquidade das envolventes e a posta a terra dos
cadros de mando e protección. Estas actuacións contribúen a reforzar a seguridade, a
fiabilidade e a durabilidade da instalación.
Máis medios para a recollida selectiva de residuos
A Xunta destinou tamén máis de 14.000 euros a mellorar a xestión dos residuos no polígono. A actuación permitiu ampliar os medios dispoñibles para a recollida selectiva nun
recinto que xa conta cun punto limpo municipal, pero que precisaba reforzar a dotación de
contedores nas súas vías interiores.
En concreto, instaláronse en total 23 contedores, dez contedores azuis de tres metros
cúbicos de capacidade para papel e cartón e 13 contedores amarelos de 1.100 litros para
envases de plástico, metal e briks. A súa distribución polas vías do recinto, especialmente
nas proximidades dos accesos ás empresas, facilita o depósito dos residuos e favorece a
súa separación na orixe. Estes novos medios permitirán xestionar arredor de 27 toneladas anuais de papel e cartón e aproximadamente 159 toneladas de envases ao ano, de acordo coas frecuencias de recollida previstas.
A mellora complementa os servizos do punto limpo de Melide, situado no propio polígono, que permite depositar diferentes tipos de residuos, como aceites vexetais, restos de
pequenas obras, podas, baterías de automóbiles, electrodomésticos, mobles, colchóns e
outros residuos voluminosos.
Máis de 1,3 millóns de euros para os parques empresariais da provincia
As actuacións da Madanela forman parte da convocatoria de axudas de 2026 da Xunta
para a mellora das infraestruturas dos parques empresariais galegos, que permitiu
financiar 53 actuacións en toda Galicia.
PUBLICIDADE
Na provincia da Coruña concedéronse 22 axudas en 18 concellos, que benefician 19
parques empresariais, por un importe próximo aos 1,3 millóns de euros. Belén do Campo explicou que estas subvencións poden cubrir ata o 80 % do investimento subvencionable, cun límite de 120.000 euros para as solicitudes individuais e de 138.000 euros para as conxuntas.
Como novidade da convocatoria deste ano, tamén se podían financiar melloras das
infraestruturas e dos espazos públicos dos parques empresariais para favorecer a súa
integración paisaxística. Ademais, as axudas permitían acometer actuacións relacionadas coa iluminación pública, as plantas de depuración de augas, os colectores con vertido á
depuradora municipal, a xestión de residuos, as infraestruturas viarias e os servizos
centralizados de subministración de gas e hidróxeno.
A delegada subliñou a importancia de apoiar os concellos que xa dispoñen de parques
empresariais en funcionamento e que precisan modernizar as súas instalacións para ofrecer mellores servizos ás empresas e favorecer o desenvolvemento da actividade
económica.
Comentarios