Queda aberta a tempada de cocidos

Ecos da Comarca/Xeral

Xa estamos metidos de cheo no inicio da tempada das nabizas, ese momento do ano que a moitos de nosoutros nos fai brillar os ollos. Hai moita xente que as confunde co grelo, pero para iso aínda nos queda esperar un par de meses, que o grelo ten o seu tempo e a súa ciencia. Agora mesmo o que manda na mesa é a nabiza, esa folla tenra e verde que nos anuncia que o tempo está mudando e que o frío empeza a asomar a cabeza.

 Todo comezou con aquelas sementes que moitos plantamos alá polo San Ramón. Coas primeiras chuvias de finais de agosto foron nacendo, aínda que teño que dicirvos que a cousa non foi todo o ben que debería. A falta de auga nalgúns momentos tamén nos afectou e a verdade é que foron nacendo por parroquias, unhas mellor que outras, dependendo de como caera a nube. Pero iso si, teño que dicirvos que as que naceron están espectaculares. Son pequenas xoias da nosa terra que valen o seu peso en ouro.

O verán está moi ben, todos disfrutamos do sol e das verbenas, pero o outono e o inverno en Galicia son outra historia, teñen unha maxia que non se explica, vívese. Imaxinade por un momento que nos imos a unha casa tradicional galega, un deses días de moita choiva ou vento fóra. Estamos alí sentados detrás da cociña, e xa non vos digo nada do arrecendo que desprende toda a casa mentres se está facendo a comida. Ese cheiro que te abraza nada máis entrar pola porta e que che quenta a alma antes de probar bocado. Miras pola ventá o mal tempo que fai e ti estás alí, protexido, ao lado da cociña bilbaína, cun prato de nabizas ben quentiño diante de ti.

 PUBLICIDADE

Preme na imaxe para obter máis información.

Non hai nada no mundo que poida superar esa sensación de paz e de benestar. Moitos din que o mellor cocido de toda Galicia é o de Lalín, e oia, teñen a súa fama ben merecida e respectamos moito o que fan alí, pero deixádeme que eu dubide un pouco. Para min, e seguro que para moitos de vós, o mellor cocido do mundo enteiro é o que se fai en cada unha das vosas casas. Ese que se cociña cos produtos que criastes con moito agarimo e paciencia durante todo o ano.

Un bo anaco de polo da casa, un pedazo de terneira galega das nosas pradeiras, a cachucha que non pode faltar nunca, un bo cacho de costela, ese chisco de unto que lle dá o sabor auténtico e de sempre, e por suposto as patacas da horta e as nabizas ou grelos segundo a época do ano na que esteamos. Cando tes iso diante na mesa, sentas coa familia e empezas a desfrutar de cada bocado, nese momento dásche conta da sorte inmensa que temos de vivir onde vivimos. Se ter este manxar na mesa e esta tranquilidade na casa non é ser ricos, entón eu prefiro ser pobre toda a miña vida. Porque a verdadeira riqueza está nestes pequenos detalles, no sabor da nosa terra e no calor do noso fogar. Se mentres me escoitabas se che fixo a boca auga e xa estás sentindo o sabor desa pataca coa nabiza, xa sabes o que tes que facer.

 PUBLICIDADE

Preme na imaxe para contactar connosco.

Pon a pota ao lume hoxe mesmo, prepara todo con xeito e non te esquezas de convidar a comer a este que vos fala, que eu por un bo prato de comida da nosa terra vou ata onde faga falta sen pensalo dúas veces.