O BNG de Lalín reclama unha actuación urxente na Rúa da Ponte

Ecos da Comarca/Lalín

O BNG de Lalín levará ao vindeiro pleno municipal unha moción a través da cal reclama ao Concello unha actuación urxente na Rúa da Ponte. Recalca que a Rúa da Ponte constitúe unha das vías de entrada e saída do núcleo urbano de Lalín e, polo tanto, un espazo de especial importancia tanto para a mobilidade e seguridade da veciñanza como para a propia imaxe da vila. "Porén, o estado actual de diferentes elementos desta rúa evidencia unha situación de falta de mantemento e conservación que require dunha actuación decidida por parte do Goberno municipal".

Foto de arquivo do entorno da Rúa da Ponte de hai meses.

O BNG de Lalín xa trasladou estas deficiencias ao Concello e mantivo contacto coa

veciñanza da zona, que veu manifestando reiteradamente a súa preocupación polo estado

deste espazo público.

"Entre as principais deficiencias detectadas atópanse o deterioro das beirarrúas, con fochancas, desniveis e zonas levantadas que dificultan o tránsito peonil e poden representar un risco, especialmente para persoas maiores, crianzas ou persoas con mobilidade reducida. A estas deficiencias súmase o estado de abandono dalgunhas fincas e parcelas situadas na contorna da vía, tanto de titularidade pública como privada, coa presenza de vexetación excesiva que contribúe a empeorar a percepción de abandono e pode xerar problemas de salubridade e seguridade", lamenta o Bloque.

Outro dos problemas máis evidentes, apunta que é o estado do Rego dos Valados, que atravesa a Rúa da Ponte e desemboca no río Pontiñas. A acumulación de vexetación e lixo e a falta dun mantemento adecuado provocan que o seu leito presente un estado claramente deficiente.

O BNG considera necesario que o Concello actúe sobre este punto de maneira inmediata,

realizando as tarefas de limpeza e mantemento que sexan da súa competencia e, paralelamente, estudando a solución definitiva para a súa canalización ou acondicionamento, en coordinación, se fose necesario, con Augas de Galicia e demais

administracións competentes.

"Especial preocupación presenta tamén o *sendeiro peonil que comunica a Rúa da Ponte

coa contorna do supermercado Mercadona*. O seu estado dificulta o tránsito, especialmente en días de choiva, e a falta de iluminación adecuada compromete a

seguridade das persoas que utilizan este itinerario. Non resulta razoable que unha zona urbana utilizada diariamente pola veciñanza careza das condicións mínimas de accesibilidade, seguridade, limpeza e conservación que deben caracterizar o espazo público municipal", recalca.

 PUBLICIDADE

Preme na imaxe para obter máis información deste evento.

A solución, puntualizan os nacionalistas, "tampouco pode limitarse á realización de actuacións puntuais ou de simple parcheo. É necesario que o Goberno municipal realice unha avaliación integral das necesidades da Rúa da Ponte e estableza unha planificación de actuacións que permita resolver de maneira progresiva todas as deficiencias existentes".

O BNG entende que a veciñanza da Rúa da Ponte ten dereito a contar cos mesmos

estándares de conservación e calidade dos espazos públicos que o resto dos barrios e rúas de Lalín.

Por todo o exposto, o Grupo Municipal do BNG considera imprescindible que o Concello "abandone a situación de inacción e adopte medidas concretas, cun calendario e

compromiso de execución".

ACORDOS

Por todo o anteriormente exposto, o Grupo Municipal do BNG de Lalín insta ao Pleno da

Corporación á adopción dos seguintes acordos:

1. Instar ao Goberno municipal a realizar, con carácter inmediato, unha inspección técnica integral da Rúa da Ponte, identificando todas as deficiencias existentes en

   beirarrúas, pavimento, iluminación, mobiliario urbano, zonas verdes, drenaxe e demais

    elementos do espazo público.

2. Elaborar un plan de actuación para a Rúa da Ponte, con prioridade para as actuacións que afecten á seguridade e accesibilidade peonil, establecendo unha programación concreta e os correspondentes prazos de execución.

3. Proceder ao arranxo das beirarrúas e zonas de tránsito peonil que presenten fochancas, desniveis, levantamentos ou calquera outra deficiencia que dificulte ou poña en risco o tránsito da veciñanza.

4. Executar unha limpeza e acondicionamento inmediato do Rego dos Valados, retirando a vexetación, lixo e demais elementos que obstrúan o seu leito, e garantir posteriormente un programa periódico de mantemento.

5. Estudar e impulsar, en coordinación coas administracións competentes, unha solución definitiva para o acondicionamento e canalización do Rego dos Valados, evitando que a situación actual se reproduza no futuro.

6. Acondicionar o sendeiro peonil que conecta a Rúa da Ponte coa contorna do Mercadona, garantindo que sexa transitable durante todo o ano e especialmente en

   períodos de choiva.

7. Dotar de iluminación suficiente e adecuada o itinerario peonil mencionado, co

    obxectivo de garantir a seguridade das persoas usuarias durante as horas de pouca luz.

8. Revisar e reparar ou substituír o mobiliario urbano deteriorado existente na

   contorna da Rúa da Ponte.

    PUBLICIDADE

Preme na imaxe para contactar connosco.

9. Intensificar as actuacións municipais de limpeza, desbroce e conservación das

 parcelas e espazos públicos da zona e, no caso das parcelas de titularidade privada que incumpran as obrigas de conservación, aplicar os mecanismos previstos na normativa municipal e na lexislación vixente.

10. Que o Goberno municipal informe aos grupos da Corporación, na comisión correspondente, sobre as actuacións previstas na Rúa da Ponte, os recursos económicos destinados a elas e o calendario previsto para a súa execución.

11. Que o Concello manteña contacto coa veciñanza da Rúa da Ponte para coñecer de

primeira man as necesidades existentes e facer seguimento do cumprimento das actuacións acordadas.