O BNG de Lalín propón un plan municipal de atención a familias e persoas vulnerables

Mari Fernández denuncia “situación de abandono” de moitas familias “nun momento especialmente complicado”

Ecos da Comarca/Lalín

O BNG de Lalín considera “urxente” a posta en marcha no concello dun “Plan Municipal de Atención a Familias e Persoas Vulnerables” que dea resposta á auténtica “emerxencia socioeconómica” que están a experimentar veciñas e veciños deste concello. A voceira municipal, Mari Fernández Sanmartín, explica que o BNG local “ten constatado sobre o terreo moitas destas situacións de vulnerabilidade” tanto de veciñas e veciños a título individual como de familias enteiras, e demanda “unha resposta axeitada do goberno municipal”. Diante destas situacións “é cando se ve si hai un goberno local que se preocupa pola veciñanza” e exixe “que nos convoquen a todos os grupos municipais para deseñar actuacións de política social municipal”.

O contexto socioeconómico actual “está a xerar problemas a moitas familias”, destaca Fernández Sanmartín, a suba dos prezos dos combustibles, da cesta da compra, dos impostos municipais e o “imposible” mercado da vivenda en Lalín “están a complicarlle chegar a fin de mes a moitas familias do noso concello que xa se atopan en situación de vulnerabilidade”. A vivenda “leva xa máis do 40% das rendas dos fogares das nosas veciñas e veciños”, advirte Fernández Sanmartín, “polo que en moitos fogares sumar a iso encher a neveira, os gastos escolares e os custes enerxéticos provoca que non dean as contas”.

Desde o BNG de Lalín “temos claro que o concello ten que estar aí para detectar á veciñanza vulnerable e aportar orzamento e medidas efectivas de axuda sobre o terreo”. Segundo afirma Fernández Sanmartín “non é de recibo que só teñamos un goberno local para subir taxas e impostos municipais e recadar 600.000 euros máis nun ano”. Por iso o BNG de Lalín quere que este aumento “indecente” dos ingresos municipais “revirta na veciñanza, e especialmente na xente que o está pasando mal pola coxuntura económica e polo aumento impositivo imposto polos goberno do PP no concello”.

 PUBLICIDADE

Se queres obter máis información do evento preme na imaxe.

Advirte o BNG que “as políticas das cestas natalicias están moi ben pero evidentemente non son suficientes, e non cubren as necesidades de toda a poboación”. Segundo destaca a voceira nacionalista “tampouco están a dar moi bo resultado, cando segundo os últimos datos oficiais do IGE estamos en pouco máis dos 20.000 habitantes e con risco de perder a categoría”. Diante desta situación o BNG pide “alturas de miras, e un goberno que mire pola veciñanza”. Critica Fernández Sanmartín que os servizos sociais do concello “están de costas á realidade social da cidadanía”. Por iso, o BNG de Lalín pide “uns servizos sociais á altura das veciñas e veciños e do que pagan de impostos municipais”. 

Necesidade “urxente” de medidas

Fronte ao discurso do goberno local do PP de “botar balóns e competencias fóra”, o BNG defende que “hai medidas e políticas sociais que un concello como Lalín pode poñer en marcha e financiar. Só hai que establecer prioridades”, asegura Fernández Sanmartín, que convida ao PP de Lalín a “sentarse con todos os grupos municipais e deseñar un plan de accións urxentes sobre o terreo que axuden ás persoas e familias vulnerables”.

 PUBLICIDADE

Preme para obter máis información.

Desde a cesta da compra, a menús diarios, colaboracións con comerciantes locais e empresas e o deseño dunha “rede municipal” preocupada pola cidadanía e que atenda ao contexto socioeconómico para prestar a cada veciña e veciño a “atención, servizos e coidados polos que todos e cada un pagan en taxas e impostos”.