O BNG de Lalín advirte que a falta de ambulancia medicalizada “pon en perigo cada día” a vida da veciñanza

Mari Fernández denuncia que a de Soporte Vital Básico 12 horas “é insuficiente para atender a demanda das urxencias sanitarias de Lalín”

Ecos da Comarca/Lalín

O BNG de Lalín vén de recibir nas últimas semanas novas queixas de veciñas e veciños que soportaron “tempos de agarda de até 50 minutos” por unha ambulancia para atender urxencias graves de patoloxías cardíacas e respiratorias.

Presentación da ambulancia de Soporte Vital Básico para Lalín.

"Fai anos que o BNG demanda para Lalín unha ambulancia medicalizada que preste un

servizo sanitario público e de calidade ás veciñas e veciños de Lalín, fronte a esta demanda social a única resposta do Sergas foi unha ambulancia de Soporte Vital Básico

cunha quenda de 12 horas, que neste tempo ten demostrado que é “insuficiente”". A

voceira municipal, Mari Fernández Sanmartín, critica que “a Xunta de Galicia co beneplácito do goberno do PP de Lalín está a poñer en risco cada día a vida e a saúde

das e dos lalinenses”.

Advirte Mari Fernández “o descontento e a angustia” con que a veciñanza de Lalín segue a trasladar ao BNG “os seus casos e experiencias con este servizo, os tempos de agarda insoportables e o medo que xera nos familiares dos pacientes cando teñen unha emerxencia e teñen que chamar á ambulancia”. Sinala Sanmartín que “lamentablemente

en Lalín xa temos experiencia de ver morrer a veciños nosos polo deficiente servizo de

ambulancias” e critica que “diante das denuncias no BNG no Concello e mesmo no

Parlamento de Galicia a única resposta da Xunta foi unha nova ambulancia sen

medicalizar e a media xornada”.

 PUBLICIDADE

Se queres obter máis información do evento preme na imaxe.

Desde o BNG de Lalín “non imos parar até que a nosa veciñanza teña un servizo de

ambulancias axeitado”, por iso Mari Fernández segue a exixir unha ambulancia

medicalizada que “garanta un servizo básico do que carece a nosa veciñanza

actualmente”. Lembra Fernández Sanmartín que estas denuncias da veciñanza

responden a unha realidade que xa reflexou nun informe o Consello de Contas. Nese

informe, o organismo recoñece que 198 concellos galegos -entre os que está Lalín- non

contan coa cobertura axeitada de servizo de transporte sanitario urxente, asegurando

mesmo que en 144 concellos -Lalín e o Deza incluídos- teñen un tempo de resposta para

emerxencias sanitarias de até 40 minutos e 37 segundos superior ao tempo medio de

resposta en todo o país.

 PUBLICIDADE

Preme para obter máis información.

Coa cobertura actual do servizo de ambulancias en Lalín, advirte o BNG que “a Xunta do PP xoga á ruleta rusa coa vida e a saúde das veciñas e veciños”. Critica Fernández Sanmartín que o PP en Santiago e en Lalín “venderan como un gran logro unha ambulancia de Soporte Vital Básico durante 12 horas ao día, seica as e os lalinenses temos que ter coidado en que horario temos unha emerxencia sanitaria”. Fernández Sanmartín afirma que “a realidade é teimuda, e as veciñas e veciños están a sufrir no día

a día a insuficiencia deste servizo”.

Por iso, sinala a voceira municipal nacionalista que “non imos calar, non imos deixar de

demandar en todas as instancias unha ambulancia medicalizada que saque ao noso

concello desa lista negra de lugares do país onde a Xunta de PP xoga coa vida e a saúde

da xente”. Destaca Mari Fernández que “seguimos cos recortes e as deficiencias na

sanidade pública, e acabará acontecendo unha desgracia, e despois non vale botar as

mans á cabeza”.