O BNG de Dozón reclama investimentos para o sector primario ante o abandono das infraestruturas rurais

Ecos da Comarca/Dozón

O BNG de Dozón reclama investimentos para o sector primario fronte ao abandono das infraestruturas rurais. Os nacionalistas consideran que o rural non pode vivir só do escaparate do Xacobeo "mentres os núcleos rurais están claramente descoidados, con especial énfase nas pistas, nun estado lamentable sen que o concello se preocupe destas

eivas e dos efectos que teñen na vida da veciñanza e dos titulares das explotacións

afectadas".

Dende a formación nacionalista expresan a preocupación ante a política de investimentos que a Xunta de Galicia está a desenvolver no concello de Dozón, priorizando unha vez máis actuacións ligadas ao turismo e ao Xacobeo mentres continúan sen resolverse necesidades básicas que afectan directamente á vida diaria da veciñanza e ao futuro do rural.

O anuncio de máis de 1,5 millóns de euros para a rehabilitación da antiga reitoral de San Salvador do Castro como albergue de peregrinos, contrasta coa realidade que sofren moitos veciños e veciñas do municipio: "estradas locais deterioradas, vías de servizo da autovía intransitables, camiños veciñais en mal estado e accesos fundamentais para a actividade agraria e gandeira convertidos en auténticos lodazais que en moitos casos os obrigan aos usuarios a arranxalos puntualmente para que os vehículos particulares, tractores e camións relacionados coa actividade agrícola e gandeira poidan pasar por eles".

 PUBLICIDADE

Se queres obter máis información do evento preme na imaxe.

“Defendemos un modelo de investimento público que poña no centro ás persoas que viven e traballan no rural os 365 días do ano. As administracións deben priorizar infraestruturas e proxectos que garantan a mobilidade, a seguridade e a competitividade

das explotacións agrarias e gandeiras, así como a calidade de vida da veciñanza” sinalan dende o BNG criticando ademais "a falla de investimento do concello no rural que se volveu perpetua neste mandato, cun rexedor local ausente en canto a políticas e medidas

que palíen as eivas e resolvan as necesidades dos veciños". “Non se pode falar de fixar poboación nin de futuro para o rural mentres moitas familias seguen sufrindo dificultades

para desprazarse, transportar producións agrícolas e gandeiras ou acceder a servizos

básicos en condicións dignas. As infraestruturas locais son esenciais para a economía e a

cohesión territorial, e deben ser unha prioridade política” aclara o concelleiro nacionalista

Miguel Docasar.

 PUBLICIDADE

Preme para obter máis información.

Consideran necesario equilibrar os investimentos destinados ao turismo co apoio real ao tecido produtivo e social dos concellos rurais. "O Camiño de Santiago pode ser unha oportunidade, pero nunca pode converterse nunha escusa para esquecer as necesidades de quen sostén vivo o territorio". Por iso, reclaman á Xunta de Galicia e ás administracións competentes un compromiso firme co rural, apostando por actuacións que melloren as infraestruturas agrarias, os accesos ás explotacións, os servizos públicos e as condicións de vida da veciñanza. “O futuro de Dozón e do interior de Galicia non pode construírse só para quen pasa, senón pensando en quen permanece” conclúen.