O BNG de Dozón denuncia un "modelo de xestión a dedo que prexudica a economía local"

Ecos da Comarca/Dozón

O Bloque Nacionalista Galego en Dozón quere informar á cidadanía e aos medios de comunicación "da gravidade técnica e ética que supón o uso continuado de levantamentos de reparo para o servizo de limpeza municipal por parte da Alcaldía. Máis alá da crise de sucidade puntual, estamos ante un sistema de xestión que vulnera os principios básicos da administración pública", recalca e levará ao vindeiro pleno unha moción na que abordará este tema.

"• Vulneración da Lei de Contratos: O uso sistemático do levantamento de reparos perverte unha figura legal que só debería ser excepcional para emerxencias, converténdose nunha vía de escape habitual para evitar a fiscalización da Secretaría-Intervención.

• Contratación "a dedo": A ausencia dun proceso de licitación pública implica que o Alcalde escolle directamente á empresa proveitadora, sen cumprir cos principios de publicidade e transparencia que esixe a lexislación vixente.

• Eliminación da libre competencia: Ao non sacar o servizo a concurso, o Concello impide que outras empresas do sector poidan presentar as súas ofertas, eliminando de facto a competencia que sempre beneficia á eficiencia do servizo.

 PUBLICIDADE

Se queres obter máis información do evento preme na imaxe.

• Desigualdade de oportunidades: Este sistema pechado impide que pemes locais ou comarcais teñan a oportunidade de acceder a contratos públicos en igualdade de condicións, favorecendo un modelo de favoritismo fronte ao mérito e a oferta económica.

• Prexuízo ao erario público: Sen a concorrencia de varias ofertas, o Concello renuncia a obter o mellor prezo do mercado, o que supón que as veciñas e veciños de Dozón poderían estar pagando polo servizo máis do que sería necesario nun mercado libre e transparente.

• Abuso de poder administrativo: A firma de decretos en contra do criterio da Intervención de xeito recorrente supón unha asunción de responsabilidade persoal polo Alcalde que o BNG porá en coñecemento das autoridades de control externo.

• Risco de opacidade económica: Unha xestión baseada en facturas soltas e reparadas dificulta o control real do gasto anual acumulado, que no caso da limpeza xa supera os límites permitidos para a contratación sen publicidade.

• Inestabilidade do servizo: A falta dun contrato blindado e legal é o que provoca situacións de abandono como as vividas este mes, xa que non existen pregos de condicións que obriguen á empresa a cumprir cuns estándares mínimos de calidade e frecuencia".

O BNG de Dozón reitera que a administración pública "non pode xestionarse como unha empresa privada nin como unha leira particular. Esiximos a licitación inmediata do servizo para garantir que cada euro dos nosos veciños se gaste con transparencia, legalidade e xustiza para todas as empresas interesadas".

Así que "ante a parálise do servizo de limpeza detectada en abril de 2026 e a reiterada práctica de realizar pagos mediante levantamentos de reparo suspensivo (Decretos 2023-2026), Dozón atópase nunha situación de inseguridade xurídica e sanitaria. E dado a nula resposta, e total desidia por parte do actual goberno municipal, ás peticións e preguntas feitas en pleno, sobre as facturas con reparos de intervención levantadas por decreto, para que se regularizase a situación mantida ano tras ano", levará ao pleno unha moción.

 PUBLICIDADE

Preme para obter máis información.

Por o exposto anteriormente o Concelleiro Municipal do BNG propón ao Pleno da Corporación Municipal a adopción dos seguintes

Acordos:

1. CESAMENTO DA IMPROVISACIÓN: Prohibición inmediata de realizar tarefas de limpeza en edificios públicos fóra de horario e por persoal sen contrato ou amparo legal.

2. LICITACIÓN PÚBLICA DO SERVIZO: O Concello de Dozón comprométese a sacar a concurso público o servizo de limpeza de edificios municipais nun prazo non superior a 30

días, garantindo o cumprimento da Lei de Contratos.

3. AUDITORÍA DE PAGOS: Creación dunha comisión informativa para analizar por que se

pagaron máis de 60.000 € en facturas de limpeza ignorando os informes de reparo da

Intervención.

4. PROTOCOLO DE HIXIENE: Garantir por contrato a limpeza diaria e profesional do Centro de Saúde e o Colexio, con penalizacións graves para a empresa se o servizo se interrompe.