O BNG de Arzúa denuncia "a campaña de desinformación do PP" sobre a homenaxe a Reboiras
- ecosdacomarca
- hace 6 horas
- 3 Min. de lectura
A organización nacionalista critica a actitude do Partido Popular por “falta de rigor e por amosar unha faciana cada vez máis reaccionaria”
Ecos da Comarca/Arzúa
O BNG de Arzúa vén de denunciar "a campaña de desinformación posta en marcha polo Partido Popular en relación coa iniciativa colaborativa" para a colocación dun monólito de lembranza e homenaxe á figura de Moncho Reboiras, coincidindo co 50 aniversario do seu asasinato. Sinala que esta homenaxe insírese nos actos que as fundacións Galiza Sempre, Terra e Tempo e Moncho Reboiras están a desenvolver por todo o país co obxectivo de manter viva a memoria de Xosé Ramón Reboiras Noia, asasinado en Ferrol pola policía franquista o 12 de agosto de 1975, converténdose na última vítima do franquismo na Galiza.
O BNG de Arzúa quere deixar claro que "esta iniciativa non lle custará nin un só euro ao Concello de Arzúa". O único compromiso adquirido pola Alcaldía nacionalista coas entidades promotoras é a cesión dun espazo público para situar o monólito, dando así continuidade na vila á campaña cultural e memorial que estas tres fundacións están a impulsar por todo o territorio galego.
Fronte a isto, a organización nacionalista denuncia a actitude do Partido Popular, que “se compromete a retirar unha homenaxe a unha vítima recoñecida do franquismo e lanza acusacións sobre o seu financiamento sen ningún tipo de coñecemento nin rigor”. Segundo o responsábel local, Xurxo Gómez, “o Partido Popular está amosando unha faciana cada vez máis ultra e reaccionaria: primeiro cualificou como simple vandalismo as pintadas fascistas sobre a estatua de Juan Vidal, e agora é incapaz de recoñecer a contribución de Moncho Reboiras á loita pola liberdade deste país, unha loita que lle custou a vida cando só tiña 25 anos”.
O BNG lembra que accións conmemorativas polo 50 cabodano do asasinato de Moncho Reboiras xa se levaron a cabo noutros concellos —como A Coruña ou Santiago de Compostela— sen que o PP dese ningún sinal de protesta nin cuestionase a figura do homenaxeado, polo que resulta especialmente preocupante e sorprendente a actitude do PP de Arzúa, “que se sitúa, unha vez máis, no sector máis reaccionario do Partido Popular de Galiza”.
Gómez engade que o PP está a actuar “lanzando acusacións infundadas que demostran a súa pouca vontade de ser rigoroso, utilizando a desinformación e os bulos como arma política”.“O que demostra o señor Rivadulla ao negar homenaxes a persoas como Moncho Reboiras é que se sitúa cada vez máis cómodo no lado contrario ao polo que Moncho deu a vida: no lado contrario ao antifascismo e á loita pola liberdade”, concluíu.
Publicidade
O BNG de Arzúa lamenta tamén que as formacións Alternativa por Arzúa e o PSdeG-PSOE "fosen vítimas desta campaña de desinformación, contribuíndo a agrandar o bulo arredor desta iniciativa ao emitir comunicados sen antes contrastar co BNG en que consistía realmente. O único obxectivo é que todas as persoas coñezan quen foi a última vítima galega do franquismo: un mozo que loitaba pola liberdade do seu pobo cando foi asasinado pola ditadura”, subliña Gómez.
Finalmente, o BNG confirma que a campaña desenvolverase exactamente como estaba prevista desde o principio, sen supor gasto ningún para o Concello de Arzúa.“O único que se pretende é, como pobo, manter viva a memoria de Moncho Reboiras e de todas as persoas que loitaron pola liberdade, a xustiza social e a dignidade da Galiza, desafiando o franquismo e o seu réxime de terror”, conclúe Xurxo Gómez.
NOTICIAS RELACIONADAS:
Arzúa instalará un monolito de Xosé Ramón Reboiras Noia no 50 aniversario do seu asasinato: https://www.ecosdacomarca.com/post/arz%C3%BAa-instalar%C3%A1-un-monolito-de-xos%C3%A9-ram%C3%B3n-reboiras-noia-no-50-aniversario-do-seu-asasinato
O PP de Arzúa rexeita a instalación dun monolito a Moncho Reboiras: https://www.ecosdacomarca.com/post/o-pp-de-arz%C3%BAa-rexeita-a-instalaci%C3%B3n-dun-monolito-a-moncho-reboiras
Comentarios