O BNG da Montaña organiza hoxe, 4 de xullo, un acto público con Néstor Rego en Melide

Ecos da Comarca/Melide

O BNG anima á veciñanza a participar do acto público organizado para este sábado 4 de xullo no Cantón de San Roque en Melide no que participarán Néstor Rego, deputado nacionalista no Congreso; Ana Mosteiro, voceira da formación no concello de Melide e Alba Regueiro, integrante da Comisión Permanente de Galiza Nova. Será ás 12 horas no Cantón de San Roque.

 PUBLICIDADE

Preme para obter máis información.

Neste encontro daranse conta das diferentes propostas que o BNG está a formular a nivel estatal para defender os intereses de toda a sociedade galega, mais tamén dos proxectos que puideron desbloquearse grazas ao traballo decidido da formación nacionalista e que se están a materializar a diversos niveis, como pode ser a recente aprobación do proxecto da transferencia titularidade da autoestrada AP-9. Mais tamén se expoñerán as alternativas para enfrontar graves problemáticas que está a atravesar a mocidade galega, coma a crise da vivenda ou as dificultades da emancipación.

 PUBLICIDADE

Preme na imaxe para obter máis información deste evento.

Este acto vén enmarcado dentro da campaña que está a desenvolver a formación nacionalista a nivel nacional co gallo do Día da Patria Galega, na que chama a toda a sociedade a mobilizarse na manifestación nacional que percorrerá as rúas de Compostela o vindeiro 25 de xullo baixo o lema “Somos unha nación. Soberanía e dereitos nun mundo en paz”. Este é o primeiro dos actos que o BNG da Montaña organiza dentro desta campaña, que seguirá desenvolvéndose por outros concellos da comarca nas vindeiras semanas.