O BNG cruceño apostará pola regularización da escola de música e a promoción das bandas do concello

“Tanto a Banda Artística de Merza como a Banda Unión Musical de Ponteledesma constitúen un patrimonio inmaterial que debemos preservar, promover e apoiar", recalca

Ecos da Comarca/Vila de Cruces

O BNG de Vila de Cruces apostará pola regularización da escola de música e a promoción e potenciación das bandas de música do municipio.

Membros das bandas de Merza, Lina Pérez e Pablo Fernández, e da Banda de Ponteledesma Toño Rial, xunto con Carlota Salgado e Alex Fiuza.

“Tanto a Banda Artística de Merza como a Banda Unión Musical de Ponteledesma constitúen un patrimonio inmaterial que debemos preservar, promover e apoiar para convertelos nun activo cultural, turístico e económico de Vila de Cruces”, incide o partido nacionalista. Por iso, quere levar "por bandeira as dúas bandas do concello, as cales unen tradición e modernidade sementando cultura, gusto pola música e unha profesión para moita xuventude. Foméntase a pertenza a un grupo, a unha identidade propia e ensínase música da man de profesionais de primeira liña. A nosa esencia como pobo presérvase en boa medida nas Bandas de Música Populares por iso dende o BNG lles ofrecemos un apoio incondicional".

Así mesmo, sinala que "regularemos as condicións e contrato para obter unha Escola de Música Municipal en condicións tanto económicas como de espazos. A escola é a semente das bandas. Melloraremos a accesibilidade e iluminación no Auditorio de Ponteledesma, proporemos unha ampliación do Auditorio de Merza e solución aos aseos. En canto aos espazos da escola, en tódalas súas ubicacións, melloraremos as condicións de acústica, distribución, calefacción e humidades".

Sistema de financiamento

Así mesmo, apunta que "cambiaremos o sistema de financiamento, pasando a ser subvencións por concorrencia competitiva. Aboarase o custo necesario para sufragar os gastos do director/a e ademais cada banda podería concorrer a máis financiamento en base a proxectos que presenten. Crearemos a REDE BAM-UMPL a través da cal as comisións de festas do concello de Vila de Cruces poderán solicitar para as festas parroquiais a calquera das bandas cun 30% do custo sufragado por parte do Concello".

Preme na imaxe se queres contactar connosco.

Un festival

Deste xeito, indica, "fomentaremos unha maior actividade de ámbolos colectivos dentro do noso concello, abrindo así canles no noso territorio e fomentando a música de banda nas celebracións das festas parroquiais. Destinaremos un mes no ano á música co FESTIVAL TRANSVERSAL-SONORO, realizando actividades de creación, concertos, conferencias e proxectos transversais con outras artes e agrupacións do concello, como poden ser a danza, o teatro, o deporte, a creación plástica ou a literatura. Crearemos un mecanismo de salvagarda das bandas impulsando traballos de investigación e creando un arquivo de historia oral, fotográfica, de son e imaxe, co fin de coidar a tradición, pasando a ser un activo de promoción cultural, turística e económica do concello".

BIC

Por último, subliña que "seguiremos a presentar no Parlamento a solicitude de que as bandas de música populares sexan consideradas BIC, Ben de Interese Cultural o que abrirá portas a novas vías de financiación e recoñecemento. Faremos fincapé na promoción e difusión das Bandas acudindo a feiras e convencións, Semana Verde, Fitur... xa que para nós, o patrimonio inmaterial é un dos piares fundamentais para atraer turismo e conservar a cultura do noso concello".