O BNG alerta dunha nova suspensión do servizo da barcaza de Portodemouros

Os nacionalistas reuniranse co veciñanza de Loño (Vila de Cruces) e Beigondo (Santiso) o 5 de decembro

Ecos da Comarca/Xeral

Tras a visita a zona no pasado mes e a presentación das iniciativas parlamentares que solicitan o cumprimento das condicións do contrato do servizo da barcaza por parte da empresa concesionaria, o BNG das localidades afectadas de ambas marxes do encoro comezará as charlas informativas veciñais. O recente aviso da suspensión do servizo da barcaza que atravesa o encoro de Portodemouros conectando Vila de Cruces co concello ribeirao de Santiso, chega a escasos días de que o BNG comece coas charlas informativas sobre o asunto, que levarán aos alcaldes e portavoces, así coma ás respectivas deputadas comarcais a reunirse coa veciñanza.

A visita terá como obxecto informar sobre os pasos a seguir na loita para que a concesionaria cumpra co asinado no contrato, onde se comprometía a que o servizo se prestase os 365 días do ano durante as 24 horas do día.

 Publicidade

Preme na imaxe para obter máis información.

"Co gallo das reparacións e mantementos da nave, a suspensión do servizo de transporte é recorrente, causando graves problemas de mobilidade a veciños e veciñas dun lado e outro do Ulla, que pasan de facer o percorrido en menos de 15 minutos a ter que dar un rodeo que se achega aos 30 quilómetros para chegar dunha beira á outra e que en cuestión de tempo duplica o da barca", salienta o Bloque. As reunións, que se celebrarán na parroquia cruceña de Loño e na de Beigondo, no caso de Santiso, teñen data fixada para o vindeiro día 5 de decembro ás 19:00 horas e ás 21:00 horas respectivamente.

Publicidade

Preme para contactar con nós e pregunta polas tarifas que son unha bicoca!

Nas xuntanzas que promoven o alcalde do BNG de Santiso e o portavoz nacionalista de Vila de Cruces, Manuel Adán e Álex Fiúza, contarán tamén coa presenza das deputadas das comarcas afectadas, Iria Carreira e Ariadna Fernández. Estas dúas postas en común serán a previa de posibles concentracións veciñais en sinal de rexeitamento da suspensión do servizo, así coma un lugar de debate para próximas accións a tomar, expoñendo as distintas solicitudes de información rexistradas durante este mes. Así mesmo, trasladarase á veciñanza a posibilidade de que o asunto se trate novamente na comisión 2 do parlamento, relativa a infraestruturas, na que xa se acadara grazas a Mini Rivas, o acordo unánime de garantir o transporte entre as dúas marxes do encoro, feito que o PP deixou que se seguise incumprindo pola actual concesionaria, Naturgy.