Máxima precaución ante a Operación Especial de Tráfico nas estradas galegas entre os días 24 e 27

Laura Moure/Xeral

O delegado do Goberno en Galicia, Pedro Blanco, fixo un chamamento á prudencia nas estradas durante a Operación Especial de Tráfico (OET) «Santiago-2025», que comezou onte, xoves 24, ata ao domingo 27 de xullo de 2025, coincidindo cos desprazamentos vinculados ás celebracións do Apóstolo e ás viaxes vacacionais de fin de mes. O delegado subliñou a importancia de planificar as saídas, evitar as présas e extremar a atención na rede viaria galega.

Segundo datos do Centro de Xestión de Tráfico (CXT) Noroeste-Cantábrico, remitidos pola Xefatura Provincial de Tráfico da Coruña, a previsión global para a OET «Santiago-2025» alcanza os 6.488.000 movementos de vehículos en toda España. Deles, o 14% (aproximadamente 908.000 desprazamentos) transitarán pola rede xestionada desde este CXT. Dentro dese total, Galicia concentrará 555.000 movementos, distribuídos así: Pontevedra, 200.000 (36%); A Coruña, 191.000 (34,4%); Lugo, 82.000 (9%); Ourense, 82.000 (14,8%).

Pedro Blanco reiterou que a redución da sinistralidade esixe constancia e responsabilidade compartida, afirmando que “cada desprazamento conta” e “ningunha cifra é aceptable mentres haxa vidas en xogo”. O delegado pide especial atención aos usuarios vulnerables —motoristas, peóns e ciclistas— que en campañas anteriores representaron unha parte significativa das vítimas mortais, e insiste no cumprimento estrito dos límites de velocidade e na tolerancia cero con alcol e drogas ao volante.

Para favorecer a mobilidade e a seguridade viaria nestes días de alta demanda, a Dirección Xeral de Tráfico, en coordinación co Ministerio do Interior e cos Centros de Xestión, activará medidas de regulación dinámica: habilitación de carrís adicionais ou reversibles nos momentos de maior intensidade; establecemento de itinerarios alternativos para desconxestionar os eixos máis cargados; paralización temporal de obras en tramos críticos; e restricións á circulación de determinados vehículos pesados en datas e faixas específicas, segundo a Resolución anual de medidas especiais de regulación do tráfico.

Publicidade

Preme na imaxe para obter máis información do evento.

O dispositivo contará coa máxima dispoñibilidade de medios humanos e técnicos: axentes da Agrupación de Tráfico da Garda Civil, persoal dos Centros de Xestión, patrullas terrestres, radares fixos e móbiles, cámaras de vixilancia, paneis informativos, drons e helicóptero Pegasus para control desde aíreo, así como unidades camufladas orientadas á detección de distraccións (uso do móbil) e do non uso de cinto ou sistemas de retención infantil.

Horas e tramos previsiblemente conflitivos 

Nesta campaña recoméndase evitar as horas de saída masiva na tarde do xoves 24 (aproximadamente 16:00-22:00) e na mañá de hoxe, venres 25, cando se espera a maior concentración. Así mesmo, a mañá do sábado 26 adoita rexistrar intensidades nos accesos ao litoral, e a tarde do domingo 27 concentrará o retorno aos grandes núcleos urbanos, con posibles retencións nas principais estradas (AP-9, A-6, A-8, A-52, N-550 e outros corredores do Noroeste). Estes patróns replican os comportamentos observados noutras operacións estivais recentes.

Recomendacións para unha viaxe segura

Desde a Dirección Xeral de Tráfico insisten na importancia de planificar o itinerario máis seguro antes de emprender a viaxe, así como revisar o vehículo (pneumáticos, freos, niveis, iluminación). Tamén é fundamental adaptar a condución ás condicións meteorolóxicas e da vía: reducir a velocidade con choiva ou sarabia, aumentar a distancia de seguridade, acender as luces de cruzamento para ver e ser visto, e extremar as precaucións con néboa (regra das 3V: Visibilidade = Velocidade = distancia ao Vehículo precedente).

Publicidade

Preme na imaxe para obter máis información do evento.

Ademais, é esencial evitar as distraccións: móbil fóra da vista; descanso cada dúas horas; e alcol e drogas, cero.

Información en tempo real

Os condutores dispoñen do teléfono 011, da web e canles oficiais da /DXT, das redes sociais, dos paneis de mensaxe variable e dos boletíns nos medios de comunicación para consultar o estado das estradas, incidencias, restricións á circulación e tempos de viaxe recomendados durante a operación.