Mulleres activistas de Ecuador comparten con Ulloa Viva a loita contra as industrias extractivistas

Visitaron onte Palas de Rei, Agolada e Melide

Laura Moure/Palas/Agolada/Melide

Un grupo de mulleres da Amazonía de Ecuador visitan estes días Galicia dentro da iniaciativa “Elas paran o espolio” da Asociación Entrepueblos. Este mércores tres das activistas implicadas directamente desde hai unha década na loita contra o extractivismo no parque nacional Yanusí visitaron xunto coa Plataforma Ulloa Viva algunhas das zonas directamente afectadas polo proxecto da instalación da macrocelulosa de Altri-Greenalia en Palas de Rei.

A loita destas mulleres no proceso do parque nacional Yasuní, na Amazonía de Ecuador, contra a industria mineira e petroleira, acadou un plebiscito nacional en agosto de 2023 e cuxo resultado, favorable á protección deste espazo natural, supón un mandato popular ao que o goberno ecuatoriano aínda non deu resposta.

En Palas de Rei onte visitaron xunto coa Plataforma Ulloa Viva a veciñas que desenvolven na Ulloa proxectos vitais que respectan o territorio, xeneran riqueza e emprego e produtos de calidade. Co seu exemplo de loita en Ecuador contra as industrias extractivistas, quixeron dar o seu apoio ás mulleres da Plataforma Ulloa Viva que levan meses de loita contra a “desfeita que a instalación da macrocelulosa de Altri en Palas de Rei suporía para o medio ambiente, a economía e a saúde da poboación nas comarcas da Ulloa, o Deza, Terra de Melide e Arzúa".

Publicidade

Preme na imaxe se queres obter máis información.

Ene Nenquimo, lideresa indíxena da comunidade waorani de Gomataon, Dayuma Nango, lideresa indíxena da comunidade waorani de Toñampade, defensora dos dereitos das mulleres e da preservación da cultura waorani e Manai Prado, historiadora e activista, parte fundadora do colectivo YASunidos en defensa de territorios en contra do extractivismo, experta comunitaria en Dereitos da Natureza pola Universidade Andina Simón Bolivar visitaron na Vacariza a explotación gandeira dos Cea. Súa filla, membro da Plataforma Ulloa Viva, Mónica Cea, ensinoulles a zona onde Altri quere instalar a macrocelulosa.

Publicidade

Preme na imaxe se queres contactar connosco.

Tamén estiveron na Eira da Xoana (Ramil, Agolada) e en Milhulloa cun proxecto ecolóxico de éxito desde fai máis de vinte anos. Remataron a súa visita en Casa Alongos (Melide), un establecemento de hostelería en pleno Camiño de Santiago que se abastece de productos de proximidade da contorna.