Mariquiña e a Moura

Ecos da Comarca/Arzúa

Ola a todos. Hoxe imos viaxar ata o corazón de Arzúa, un recuncho máxico de Galicia que garda segredos que moitos visitantes nin sequera imaxinan. Xa sabemos que Arzúa é famosa polos seus queixos e por ser un punto clave no Camiño de Santiago, pero máis alá das rutas habituais, existen lugares cheos de misterio e lendas ancestrais que fan que a pel se poña de galiña. Un deses lugares é a Fonte da Quenlla, un sitio onde a realidade e a mitoloxía galega se funden nunha historia que pasou de xeración en xeración.

Pois ben, esta lenda lévanos a unha época de moita necesidade. Hai moitos anos, preto do Castro de Curbín, vivían unha nena chamada Mariquiña e a súa nai. Eran tempos difíciles e a pobreza marcaba os seus días. O seu único sustento familiar era unha vaca e unhas poucas galiñas que coidaban con moito esforzo nunha humilde casa. Cada mañá, a nena levaba a vaca a pacer ao castro para que se alimentase ben, e sempre se detiña a beber na Fonte da Quenlla, un manancial de augas puras rodeado de natureza.

Pero un día, o que parecía unha rutina máis transformouse en algo extraordinario. Na fonte apareceu unha muller misteriosa, toda vestida de branco. Algúns din que era unha fada e outros din que era unha moura, eses seres míticos que custodian tesouros baixo o noso chan. Aquela muller, con moita dozura, comezou a peitear e a perfumar o cabelo de Mariquiña cun peite de ouro, mentres o aire se enchía dun arrecendo marabilloso. A cambio dun anaco de pan que a rapaza lle convidaba, a fada regaláballe unha moeda de ouro. Imaxinade a alegría da pequena. Pero a muller de branco tiña unha condición innegociable, pediulle a Mariquiña que nunca contase o segredo a ninguén.

 PUBLICIDADE

Preme na imaxe para obter máis información.

Durante un tempo, a sorte da familia cambiou. Pero a nai, ao ver as moedas e o coitadiño arranxo da nena, que cada día estaba máis fermosa, empezou a sospeitar. A muller insistiu tanto e preguntou tantas veces que ao final a pobre Mariquiña acabou por descubrilo todo. O erro foi fatal. Nese preciso día en que a nena revelou o segredo, Mariquiña foi como sempre ao castro, pero nunca volveu. A vaca regresou soa á casa ao caer a tarde e a nena desapareceu para sempre na contorna da fonte.

 PUBLICIDADE

Preme na imaxe para contactar connosco.

Aínda hoxe, se visitas a Fonte da Quenlla en Arzúa, podes sentir esa enerxía especial que rodea o lugar. É un recordatorio de que as lendas de Galicia seguen vivas en cada pedra e en cada regato, esperando a ser contadas.