Mapeco, a creadora asturiana cunha ampla traxectoria internacional, pintará un mural en Touro

Será no edificio adxacente ao Consistorio

Ecos da Comarca/Touro

O Concello de Touro continúa dando pasos na mellora da súa imaxe e na valorización do paso do Camiño polo municipio cunha nova intervención artística de gran impacto visual.

Nos vindeiros días, o edificio adxacente ao Concello converterase nun lenzo xigante para acoller un mural de grandes dimensións da recoñecida artista internacional Mapeco (María Peña Coto). A creadora asturiana conta cunha ampla traxectoria que a levou a desenvolver proxectos en cidades de todo o mundo, como París, Sicilia, México, Porto Rico, Etiopía, Brasil, Portugal, Londres, Nova York ou China, ademais de múltiples intervencións en distintas localidades españolas.

A súa obra caracterízase pola súa potente carga visual, o compromiso social e a capacidade de transformar espazos públicos en puntos con identidade propia, elementos que encaixan coa estratexia de Touro para modernizar e dinamizar o seu núcleo urbano.

 PUBLICIDADE

Se queres obter máis información do evento preme na imaxe.

Esta actuación será posible grazas ao acordo acadado cos propietarios do inmoble, aos que o Concello quixo trasladar o seu agradecemento pola colaboración e disposición amosada para facer realidade o proxecto.

O mural estará dedicado ao Camiño Holandés, integrado na ruta EuroVelo 3, tamén coñecida como a ruta dos peregrinos. A intervención pretende ofrecer unha benvida singular ás persoas que atravesan a capital municipal, ao tempo que contribúe a embelecer o entorno e reforzar a identidade local a través da arte contemporánea.

 PUBLICIDADE

Preme para obter máis información.

A iniciativa será financiada con fondos propios do Concello e enmárcase nas accións de posta en valor do territorio e promoción cultural.