Lalín sairá á rúa o día 14 para esixir a reposición dos coidadores e unha educación inclusiva real

Laura Moure/Lalín

Familias, profesionais da educación, representantes da comunidade educativa comprometida coa defensa da escola pública, convocan unha concentración o vindeiro xoves 14 de maio ás 20:00 horas na Praza da Igrexa de Lalín para reclamar a reposición inmediata do/a coidador/a do CEIP Vicente Arias de la Maza de Vilatuxe e do CEIP Varela Buxán de Cercio, así como para reivindicar unha educación inclusiva real, digna e con recursos suficientes.

As persoas convocantes denuncian que a falta destes profesionais está a provocar importantes dificultades na atención diaria do alumnado con necesidades específicas de apoio educativo, afectando non só ao benestar dos nenos e nenas, senón tamén ao funcionamento normal dos propios centros educativos. Consideran inadmisible que se reduzan ou eliminen recursos humanos fundamentais nun sistema educativo que debe garantir a igualdade de oportunidades e a atención individualizada de todo o alumnado.

Os coidadores e coidadoras desempeñan unha función esencial dentro da comunidade educativa, prestando apoio ao alumnado que precisa acompañamento nas actividades cotiás, favorecendo a súa autonomía, integración e participación plena na vida escolar. A súa ausencia supón unha vulneración dos dereitos destes nenos e nenas e unha sobrecarga para o resto do persoal educativo e das propias familias.

As familias afectadas sinalan que levan tempo reclamando solucións á administración educativa sen obter respostas satisfactorias. Por iso, deciden dar un paso máis e facer visible esta problemática na rúa, co obxectivo de sensibilizar á sociedade e esixir compromisos reais e inmediatos por parte da Consellería de Educación.

 PUBLICIDADE

Se queres obter máis información do evento preme na imaxe.

A concentración desenvolverase baixo o lema “Pola reposición xa do/a coidador/a do CEIP Vicente Arias de la Maza de Vilatuxe e CEIP Varela Buxán de Cercio. Por unha educación inclusiva real”, unha mensaxe coa que se pretende lembrar que a inclusión educativa non pode quedar nun simple discurso institucional, senón que debe traducirse en medios, profesionais e recursos suficientes para atender adecuadamente a todo o alumnado.

As persoas organizadoras destacan que a escola pública debe ser un espazo accesible,

integrador e respectuoso coa diversidade, onde ningún neno ou nena quede atrás por falta de recursos. Neste sentido, consideran fundamental que as administracións deixen de tratar estes apoios como un gasto prescindible e entendan que son unha peza imprescindible para garantir unha educación de calidade e en igualdade.

 PUBLICIDADE

Preme para obter máis información.

A convocatoria está aberta a toda a cidadanía, especialmente ás familias, ao profesorado, ás ANPAS, aos colectivos sociais e a todas aquelas persoas que cren nun modelo educativo inclusivo e comprometido cos dereitos da infancia. As persoas convocantes animan á veciñanza da comarca a participar e a amosar o seu apoio ás familias afectadas e á defensa dunha escola pública con recursos suficientes.