Inauguración en Lalín da xornada 'Os retos dos sénior na Galicia rural'

Ecos da Comarca/Lalín

A conselleira de Política Social e Igualdade, Fabiola García, destacou esta mañá que o Goberno galego impulsará nesta lexislatura un plan de residencias, que permitirá a construción de 24 novos centros en concellos de menos de 50.000 habitantes. Así o asegurou durante a inauguración da xornada Os retos dos sénior na Galicia rural, organizada polo medio especializado 65ymás coa colaboración da Xunta. No acto, estivo acompañada do alcalde de Lalín, Xosé Crespo, e do presidente da Deputación de Pontevedra, Luis López.

Na súa intervención, a conselleira lembrou o impulso que Galicia está dando á atención á dependencia, principalmente a través do plan de choque posto en marcha en xaneiro e grazas ao que a comunidade galega conta con 90.000 persoas dependentes atendidas, reducindo nun 10% os tempos de tramitación e axilizando a atención.

Fabiola García apostou por darlle facilidades ás persoas maiores para que poidan elixir onde pasar esta etapa das súas vidas. Neste sentido, destacou iniciativas pioneiras como o Bono Coidado no Fogar, que actualmente perciben 33.000 galegos e galegas. Ademais, lembrou as iniciativas deseñadas especificamente para o rural, como a rede de Casas do Maior, que rematará este ano con 160 recursos de atención diúrna activos.

Publicidade

Preme na imaxe se quere contactar connosco.

Finalmente, a conselleira fixo fincapé na aposta da Xunta polo envellecemento activo, con programas como Benestar en Balnearios, as iniciativas deseñadas en colaboración coas universidades, as Aulas Sénior, o programa Xuntos polo Nadal ou o Carné+65. Fabiola García apostou, ademais, por aproveitar a maior esperanza de vida que rexistra a comunidade galega “como unha oportunidade para seguir deseñando unha Galicia Calidade, que sexa sinónimo de calidade de vida e calidade humana”.