Forno denuncia “opacidade e falta de transparencia” de Crespo coa polémica do Parking Europa

A socialista lalinense sinala que “seguen sen explicar en base a que ordenanza están cobrando 30 euros por un mando de acceso”

Ecos da Comarca/Lalín

A voceira municipal socialista, Alba Forno, denunciou onte a “falta de transparencia e a opacidade” do goberno de José Crespo tras recibir resposta á solicitude de acceso á documentación relacionada coa polémica reorganización do Parking Europa.

Forno lembra que o pasado 27 de abril solicitou acceso aos expedientes, actas e documentación da reunión mantida cos abonados do aparcadoiro, incluíndo o acordo polo que se lles impón o pago adicional de 30 euros por un mando de acceso á planta superior. Porén, o Concello non permitirá consultar esa documentación ata o próximo 6 de xullo.

“Estamos falando dunha reunión celebrada hai semanas e dunha documentación que debería estar perfectamente redactada e dispoñible. Que teñen que ocultar para atrasar o acceso máis de dous meses?”, preguntou a voceira socialista, que acusou directamente ao goberno local e aos concelleiros Pablo Areán e Karen Fernández de “obstaculizar o acceso á información”.

Neste sentido, advertiu de que “cada vez hai máis queixas e máis sensación de descontrol”, asegurando que incluso existen casos de persoas ás que se lles comunicou unha praza no sorteo e que, días despois, no Concello, se lles asignou outra diferente. “Hai demasiadas cousas estrañas e demasiadas preguntas sen responder”, afirmou.

  PUBLICIDADE

Se queres obter máis información do evento preme na imaxe.

Forno insistiu ademais en que o cobro de 30 euros polo mando de acceso “é irregular”, xa que “non aparece recollido en ningunha ordenanza municipal”. “Non se pode obrigar aos abonados a asumir un pago que non está regulado”, advertiu.

A voceira socialista tamén puxo o foco no malestar das persoas usuarias pola nova organización do aparcadoiro. “Hai abonados que aseguran non sentirse seguros tendo que acceder agora por unha rueiro escuero e por unha zona degradada para chegar á planta superior”, explicou.

  PUBLICIDADE

Preme para obter máis información.

Ao mesmo tempo, insistiu en que o novo modelo de gratuidade total “está facendo que o parking perda completamente a súa función de rotación para favorecer o comercio local”. “A planta inferior está chea durante horas e acumúlanse coches durante días permanentemente estacionados sen ningún tipo de control, o que impide a rotación”, sinalou.

“Foron tocar un modelo que funcionaba perfectamente e acabaron converténdoo nun problema para todo o mundo”, concluíu Forno, que acusou ao goberno do PP de “xerar caos, malestar e inseguridade por pura improvisación e sectarismo político”.