Fiúza acusa a Luis Taboada de negar "o risco sanitario na auga en Cruces" que destapou o BNG

O Bloque sinala que "a analítica realizada polo BNG o 7 de novembro, e recibida o día 12, confirma que a auga que chega ás nosas casas non é apta para consumo humano"

Ecos da Comarca/Vila de Cruces

O BNG de Vila de Cruces acusa ao alcalde, Luis Taboada, "de engañar á veciñanza e restar importancia a unha situación perigosa, despois de minimizar o estado crítico da auga da traída municipal". O voceiro do BNG, Álex Fiuza, sinala que o rexedor “xoga coa saúde da xente ao ocultar uns datos que son rotundos".

"A analítica realizada polo BNG o 7 de novembro, e recibida o día 12, confirma que a auga que chega ás nosas casas non é apta para consumo humano. O informe revela unha turbidez moi elevada e presenza de Clostridium, bacteria ligada a contaminación fecal. “Fálase de normalidade cando hai risco real. E é irresponsabilidade de quen nos

goberna”, denuncia Fiuza.

O BNG lembra que o estado do Arnego xa é grave antes de chegar ao punto de captación, que a contaminación é real e o goberno mira cara outro lado: "Agolada verte auga insuficientemente depurada cada vez que chove, Rodeiro verte directamente ao río porque nin sequera ten EDAR e a Xunta leva anos incumprindo a súa obriga de construír ou ampliar estas depuradoras".

Publicidade

Preme para contactar con nós e pregunta polas tarifas que son unha bicoca!

Pero Fiuza subliña que o Concello tampouco está a cumprir: "A EDAR de Losón, compartida con Lalín, non funciona e verte ao Deza sen control, a EDAR de Merza rexistra vertidos continuos e o vertedoiro de Campomarzo está filtrando lixiviados ao Toxa, xusto antes do punto de captación que abastece Merza".

“É intolerable que quen ten a responsabilidade de protexer á veciñanza prefira mirar para outro lado. O Concello sabe o que está pasando e non actúa”, critica o portavoz nacionalista.

Publicidade

Preme na imaxe se quere contactar connosco.

O BNG reclama medidas contundentes e sen máis demoras:

• Reclámalle á Xunta de Galiza a construción da EDAR de Rodeiro e ampliar urxentemente a de Agolada.

• Tamén demanda do Concello de Vila de Cruces a mellora e posta en marcha de inmediato as EDAR municipais.

• Renovar o sistema de captación do río Arnego.

• Controlar por analíticas constantes o impacto dos lixiviados en Merza e opoñerse dende o concello de xeito institucional a que Campomarzo se converta en vertedoiro industrial e proceder á súa limpeza total.

“O BNG fala con datos e di a verdade. Taboada fala con escusas e coa intención de tapar un risco sanitario evidente. A saúde da veciñanza non é un tema para facer propaganda nin para minimizar”, conclúe Fiuza.

NOTICIAS RELACIONADAS:

• O BNG de Cruces urxe ao alcalde a actuar para garantir auga segura e transparencia coa veciñanza: https://www.ecosdacomarca.com/post/o-bng-de-cruces-urxe-ao-alcalde-a-actuar-para-garantir-auga-segura-e-transparencia-coa-veci%C3%B1anza

• O Concello de Cruces informa de que a calidade da auga da traída está permanentemente controlada: https://www.ecosdacomarca.com/post/o-concello-de-cruces-informa-de-que-a-calidade-da-auga-da-tra%C3%ADda-est%C3%A1-permanentemente-controlada