Falece o lalinense José Presas Zobra, fundador de Recreativos Presas
- ecosdacomarca
- hace 11 horas
- 1 min de lectura
Ecos da Comarca/Lalín
Lalín espertou este domingo de loito tras coñecerse o falecemento, aos 67 anos de idade, de José Presas Zobra, fundador de Recreativos Presas e unha das figuras máis relevantes na historia do futbolín en España.
Presas foi o creador do Campionato de España de Futbolín, unha competición coa que conseguiu revitalizar este emblemático xogo de mesa, converténdoo nun deporte de competición e reunindo en Lalín, ano tras ano, a centos de participantes chegados de distintos puntos do país. Ademais, tamén impulsou a Liga Nacional de Futbolín, contribuíndo decisivamente á profesionalización e expansión desta disciplina.
Á fronte de Recreativos Presas, empresa familiar con sede en Lalín, liderou a modernización do futbolín tradicional a través da innovación no deseño, os materiais e a tecnoloxía, logrando que o produto galego acadase un importante recoñecemento tanto no mercado nacional como internacional.
PUBLICIDADE
A noticia do seu pasamento xerou unha fonda conmoción en Lalín e no mundo do futbolín, onde José Presas era unha persoa moi querida e respectada polo seu compromiso, dedicación e capacidade para converter unha afección nun referente deportivo.
PUBLICIDADE
O seu legado permanecerá vivo tanto na empresa que fundou como nas competicións que impulsou e que situaron a Lalín no mapa do futbolín español.
Dende o equipo de ECOS DA COMARCA as nosas condolencias para toda a súa familia e seres queridos. D.E.P.
