Falece o exalcalde de Rodeiro Manuel Lamazares

Ecos da Comarca/Rodeiro

O grupo municipal do PP de Rodeiro enviou un comunicado a este medio a través do cal quere expresar o seu pesar e a súa dor polo falecemento, na xornada de hoxe, do exalcalde Manuel Lamazares, que gobernou o Concello durante 32 anos entre os anos 1966 e 1998 e que tamén foi director do colexio público e corresponsal do xornal Faro de Vigo.

Os populares queren destacar a súa figura como “a dunha persoa totalmente comprometida co seu concello” desde o ámbito da educación ao que pertencía pola súa profesión ata o político e social, xa que dirixiu o Concello e atendeu aos veciños con absoluta vocación de servizo público durante máis de tres décadas. “Hoxe é un día triste pola perda dunha persoa que lle entregou a súa vida a Rodeiro e por iso cremos que é de xustiza destacar a súa figura como a do líder da transición democrática no noso municipio e como piar da transformación que vivimos ata finais do pasado século e que permite que hoxe contemos cun nivel de benestar moi por enriba da media co sector agrogandeiro do que nos sentimos tan orgullosos como bandeira”, sinalou a voceira municipal, Cati Somoza.

Ademais, o presidente provincial e da Deputación e exalcalde, Luis López; a propia Cati Somoza como presidenta do PP local; e a familiar popular de Rodeiro conformada por concelleiros, colaboradores, militantes e simpatizantes queren agradecer as infinitas mostras de cariño da veciñanza e, ao mesmo tempo, trasladan as súas condolencias e o seu pesar aos seus familiares e achegados. “Hoxe Rodeiro queda un pouco máis orfo porque Manuel Lamazares era un pai para todos os veciños, pero sabemos que sempre nos estará prestando o seu alento, porque era un cambote exemplar”, sinalou Somoza, que solicitou a declaración de loito oficial para unha figura “irrepetible” e que convidou aos veciños a expresar a súa derradeira mostra de cariño ao exalcalde asistindo mañá, xoves 12, ás 19:00 horas ao seu funeral e inhumación na igrexa parroquial de San Salvador de Camba.

Publicidade

Preme na imaxe se queres contactar connosco.

O alcalde do municipio, o socialista José Luis Camiñas, tamén mostrou o seu pesar a través das redes sociais.

"Hoxe recibimos unha triste nova para todo o Concello de Rodeiro. Aos 96 anos de idade vén de falecer Manuel Lamazares Pardo, alcalde deste Concello entre 1966 e 1998. Foron 32 anos de servizo público, nos que deixou unha fonda pegada na historia de Rodeiro e no recordo de xeracións de veciños e veciñas.

Ante esta gran perda, como alcalde acabo convocar un pleno extraordinario para mañá as 10 da mañá para homenaxear e dar recoñecemento á súa figura, no que tamén se declarará un día de loito oficial en honra a quen foi durante máis de tres décadas o noso rexedor.

Mañá terá lugar a despedida oficial no Concello de Rodeiro. Queremos acompañar á súa familia e achegados neste momento tan difícil, e agradecerlle a Manuel Lamazares o seu compromiso e dedicación ao noso pobo.

O seu legado permanecerá sempre na memoria colectiva de Rodeiro.

Descanse en paz", sinala o alcalde de Camba, José Luis Camiñas.