Erea Rey será a candidata á Alcaldía do BNG de Silleda

O Bloque pretende abrir unha nova etapa "con ambición, diálogo e proxecto"

Ecos da Comarca/Silleda

O BNG de Silleda presentou este sábado publicamente a Erea Rey Presas como candidata á alcaldía nas eleccións municipais do vindeiro ano, nun acto que contou coa participación do concelleiro Xerardo Díaz Casal, a deputada no Parlamento galego Ariadna Fernández e a alcaldesa de Tomiño, Sandra González.

Na súa intervención inicial, Xerardo destacou que a formación nacionalista decidiu “non perder nin un minuto” e comezar desde xa a traballar para ofrecerlle á veciñanza “o cambio que quere e que precisa”, apelando á “sensación crecente en todo Silleda de

que é necesario abrir unha nova etapa, con máis ambición, máis diálogo e un proxecto

claro de futuro”.

A deputada Ariadna Fernández enmarcou a candidatura de Erea Rey na continuidade dun traballo colectivo desenvolvido durante anos, sinalando que “Erea colle o testemuño de maneira exemplar” co obxectivo de levar o BNG á alcaldía e construír un concello que dea resposta ás necesidades de toda a veciñanza.

 PUBLICIDADE

Se queres obter máis información do evento preme na imaxe.

Pola súa banda, a alcaldesa de Tomiño, Sandra González, puxo en valor a experiencia de goberno do BNG nos concellos, asegurando que “é posible construír unha alternativa sólida, cercana e transformadora” e destacando que o equipo de Silleda representa “ese

espírito de proximidade, compromiso e traballo constante coa veciñanza”.

No peche do acto, Erea Rey reivindicou o traballo realizado polo BNG nos últimos anos e deu un paso adiante como candidata: “levamos tres anos traballando por unha Silleda chea de vida: unha Silleda onde a xente nova poida quedar, onde haxa servizos no rural

e onde se goberne con transparencia e diálogo”.

A candidata subliñou que a súa proposta non responde a un liderado individual, senón ao esforzo colectivo: “non fala unha cara nova, fala o traballo dun equipo comprometido durante estes anos”.

Rey contrapuxo con claridade dous modelos de concello: “20 anos de goberno do PSOE en Silleda fronte a 20 anos de goberno do BNG en Tomiño. Alí hai proxecto, transformación e diálogo. Aquí seguimos sen orzamentos, sen planificación e cun goberno que non escoita”, evidenciando a necesidade dunha alternativa política no municipio.

 PUBLICIDADE

Preme para obter máis información.

A nacionalista defendeu que “Silleda merece moito máis: un proxecto, ilusión e un goberno que conte con toda a súa xente”, e deixou claro o compromiso da súa candidatura: “non vimos a administrar a rutina, vimos a cambiar as cousas, a poñer Silleda en marcha e a poñer á xente no centro”.

Como peche, Erea Rey lanzou unha mensaxe directa de cara ao ciclo electoral que se abre: “Silleda quere cambio. E o cambio é o BNG.”