Elas Eles alerta de que o acordo con Mercosur e os recortes na PAC fan inviable a produción de carne en Galicia

Un informe técnico revela que as granxas familiares, cuxa rendibilidade actual depende ao 100% das axudas públicas, entrarían en perdas inmediatas pola caída de prezos e a redución do apoio europeo

Ecos da Comarca/Xeral

A "Tormenta Perfecta" para o campo galego: A Asociación de Gandeiras e Gandeiros Elas Eles alerta de que o acordo con Mercosur e os recortes na PAC farían inviable a produción de carne en Galicia. "O sector do vacún de carne en Galicia enfróntase a unha ameaza existencial sen precedentes. Unha nova análise de marxes económicos advirte que a combinación da entrada de carne a baixo custo do Mercosur e os previstos recortes nas axudas da PAC (especialmente no Pilar II) provocaría o colapso financeiro da maioría das pequenas e medianas explotacións familiares da comunidade", lamenta.

"A radiografía económica actual: vivir no arame"

A asociación explica que segundo os datos analizados, "o custo medio de produción dun quilo de carne de vacún en Galicia sitúase nos 5,00 €, mentres que o prezo de venda no mercado apenas acada os 4,00 €. Isto xera un déficit estrutural de mercado de -1,00 € por quilo producido. Actualmente, este buraco cóbrese grazas ás axudas directas da PAC (Pilar I), mentres que a modesta rendibilidade neta do gandeiro (+0,50 €/kg) provén case en exclusiva das axudas do Pilar II (Desenvolvemento Rural), fundamentais para zonas de montaña e produción sustentable".

 Publicidade

Preme na imaxe para obter máis información.

"O dobre impacto: Menos ingresos e menos axudas"

E salienta que un efecto devastador que tería a simultaneidade de dous factores externos: "O impacto de Mercosur (Presión sobre prezos): A entrada de carne suramericana con estándares sanitarios e laborais máis laxos presionaría á baixa os prezos en orixe. Unha caída de tan só 0,50 € no prezo de mercado (baixando de 4,00 € a 3,50 €) elevaría as perdas de mercado a -1,50 €/kg, unha cifra que as actuais axudas xa non poderían cubrir.

O recorte da PAC (Desaparición da marxe): Calquera redución nas axudas, e especificamente a hipotética eliminación ou recorte drástico dos fondos do Pilar II, eliminaría o único compoñente de beneficio neto".

"Unha sentenza de morte para o modelo familiar"

O escenario combinado, apunta, "debuxa un panorama de "números vermellos" absolutos. Se os prezos caen pola competencia desleal e o "colchón" das axudas do Pilar II desaparece, o gandeiro galego pasaría de gañar 0,50 €/kg a perder cartos por cada animal criado, mesmo contando coas axudas básicas. Non estamos a falar de gañar menos, estamos a falar de ter que poñer cartos para traballar", explican fontes do sector baseándose nos gráficos de rendibilidade. "O modelo galego, baseado na calidade, o territorio e a pequena dimensión, non pode competir en volume con Brasil nin sobrevivir sen o apoio específico ao desenvolvemento rural. É a treboada perfecta."

Publicidade

Preme para contactar con nós e pregunta polas tarifas que son unha bicoca!

Conclusións 

Tres puntos clave para a administración:

• A defensa do Pilar II é irrenunciable: As axudas a zonas con limitacións naturais e agroambientais non son un complemento, son o salario do gandeiro.

• Mercosur rompe o equilibrio: O mercado actual xa non cobre custos; introducir oferta máis barata fará que a dependencia das axudas sexa aínda maior, xusto cando se plantexan recortes.

• Risco de abandono: Sen marxe económica, o relevo xeracional é imposible, poñendo en perigo non só a produción de alimentos, senón a xestión do territorio e a prevención de incendios no rural galego.