Desarticulada unha organización criminal que usaba as estafas do “tocomocho” e a “estampita”

Ecos da Comarca/Xeral

A Garda Civil desarticulou unha organización criminal que cometía estafas co método do “tocomocho” e a “estampita” nas provincias de Sevilla, Huelva, Almería, A Coruña e Pontevedra. Foron detidas seis persoas e investigadas outras tres, polos delitos de pertenza a organización criminal, roubos con violencia e intimidación, estafa continuada, falsidade de documentos e tenencia ilícita de armas.

Estas actuacións, situadas dentro do marco do Plan Maior de Seguridade, comezaron a finais do verán pasado, despois de que os investigadores tivesen coñecemento de dous delitos de roubo con violencia ocorridos na localidade de Lebrija (Sevilla).

Os autores viaxaban de forma itinerante por todo o territorio nacional e seleccionaban a vítimas de avanzada idade, pola súa especial vulnerabilidade, para cometer os delitos. Facíano por medio das técnicas de estafa coñecidas como “tocomocho” e “a estampita”, e en ocasións chegaron a empregar violencia e intimidación. En total, lograron subtraer máis de 50.000 euros.

 Publicidade

Preme na imaxe para obter máis información.

Submisión química

Ademais, os investigadores constataron que utilizaron métodos de submisión química sobre polo menos una das vítimas para cometer as estafas, á vista das probas analíticas practicadas.

A investigación, que contou coa estreita colaboración da Policía Local de Sanlúcar la Mayor (Sevilla), permitiu identificar os membros da organización e atribuírlles a autoría de numerosos feitos delituosos detectados nas provincias de Sevilla, Huelva, Almería, A Coruña e Pontevedra, aínda que non se descartan feitos similares labores noutros puntos do territorio nacional. En concreto, en Galicia esclarecéronse un total de 11 delitos nas provincias da Coruña e Pontevedra: Oleiros 2, Carballo1, Milladoiro1, Porriño 1, Cambados 2, Mos 1 e Marín1.

Finalmente, realizáronse nove entradas e rexistros nos inmobles vinculados á organización. En concreto, dous en Toledo e sete en Cáceres. Nos rexistros interveuse unha cantidade aproximada de 20.000 euros en efectivo, xoias e outros efectos subtraídos, dous turismos, unha autocaravana e diverso material utilizado para cometer as estafas. Destaca a incautación dunha arma modificada para efectuar disparos en modo refacho, sete armas de aire comprimido, unha carabina e unha elevada cantidade de munición.

A investigación permanece aberta para localizar aos lexítimos propietarios das xoias e efectos recuperados. Os detidos, xunto coas dilixencias instruídas e os efectos intervidos, foron postos ao dispor da autoridade xudicial competente. A operación continúa aberta e non se descarta a implicación da organización en máis feitos delituosos de similares características.

Publicidade

Preme para contactar con nós e pregunta polas tarifas que son unha bicoca!

Previr o delito: Plan Maior de Seguridade

O Plan Maior de Seguridade é un programa orientado a protexer ás persoas maiores mediante a formación e a información. A través de charlas informativas en asociacións, centros de día e residencias, a Garda Civil expón os riscos e proporciona pautas claras sobre como detectalos e como evitalos.

Ademais de estafas específicas como o “tocomocho” ou a “estampita”, estas xornadas formativas abordan outros riscos relevantes do día a día, como a seguridade no propio fogar (prevención de roubos, estafas de falsos técnicos), a ciberseguridade, a seguridade na vía pública ou dentro do domicilio.