Danos na ponte de pedra de Pozo do Boi, en Lalín, tras o paso de maquinaria pesada

O Concello anuncian o inicio dos trámites para a reparación, a mellora do peche na praia fluvial e como medida preventiva, establecerase unha limitación de peso

Ecos da Comarca/Lalín

A histórica ponte de lousas de pedra situada en Pozo do Boi, na parroquia lalinense de Vilatuxe, apareceu este pasado 4 de maio con importantes danos estruturais tras o paso de maquinaria forestal de gran tonelaxe.

Segundo denuncian veciños da zona, a ponte sufriu a rotura de dúas lousas consecutivas, un feito que, aseguran, era cuestión de tempo debido ás limitacións deste tipo de construcións tradicionais. Trátase dunha estrutura de pedra pensada para usos tradicionais e tráfico lixeiro, incapaz de soportar o peso e as vibracións xeradas por vehículos forestais pesados.

Os danos provocados. Autor: Antonio Presas.

Os afectados sinalan que todas as pontes teñen un límite de resistencia e advirten de que o tránsito deste tipo de maquinaria por infraestruturas patrimoniais pode provocar consecuencias irreversibles. Neste caso, consideran evidente a relación entre o paso da maquinaria e os danos ocasionados.

Agora, a preocupación céntrase na reparación da ponte e en quen deberá asumir os custos. Desde a veciñanza insisten en que a responsabilidade debe recaer sobre quen provocou os danos e non sobre as arcas municipais, evitando así que sexa o conxunto da cidadanía de Lalín quen teña que afrontar o gasto da reparación. Por iso, falan da importancia de que o Concello deba ter unha ordenanza municipal sobre o tránsito de vehículos por pistas.

 PUBLICIDADE

Se queres obter máis información do evento preme na imaxe.

Os concelleiros de Medio Ambiente, Raquel Lorenzo, e de Obras, José Cuñarro, supervisaron "in situ" os danos xunto ao equipo técnico, e anuncian o inicio inmediato dos trámites para a reparación da ponte e de mellora do peche na praia fluvial.

 PUBLICIDADE

Preme para obter máis información.

Actuacións previstas:

• Reposición das lousas de pedra danadas polo paso dun vehículo agrícola de gran tonelaxe. Como medida preventiva, establecerase unha limitación de peso para garantir a integridade da estrutura.

• Renovación integral dos puntos de ancoraxe (pestanas metálicas) do peche de madeira para corrixir a deterioración por corrosión e humidade.

• Os traballos executaranse en canto se reciban as autorizacións preceptivas de Augas de Galicia, solicitadas previamente polo Goberno local