CSIF urxe a Deza que a subida do financiamento do SAF chegue aos salarios dos traballadores

O sindicato reclama aos gobernos locais da comarca que o incremento acordado entre a Xunta e a FEGAMP reflíctase nas nóminas e na mellora das condicións laborais

Ecos da Comarca/Deza

A Central Sindical Independente e de Funcionarios (CSIF) rexistrou escritos dirixidos aos gobernos locais dos concellos da comarca de Deza para esixir que o maior financiamento previsto para o Servizo de Axuda no Fogar (SAF) reflíctase de forma efectiva nos salarios e nas condicións laborais do persoal que presta este servizo.

Este escrito enmárcase nunha iniciativa que o sindicato está a desenvolver en todos os

concellos galegos que xestionan directamente o SAF, onde está a presentar solicitudes dirixidas aos respectivos gobernos locais para que a maior achega pública prevista para os próximos anos teña un reflexo directo nas auxiliares do servizo.

A actuación prodúcese tras o acordo alcanzado entre a Xunta de Galicia e a FEGAMP para elevar progresivamente a achega autonómica por hora, que pasará dos 12 euros actuais a 16 euros en 2026, 17 euros en 2027 e 18 euros en 2028. Para CSIF, esta evolución debe servir para avanzar na dignificación dun colectivo que sostén co seu traballo diario unha prestación esencial para miles de persoas.

 Publicidade

Preme para obter máis información.

No escrito presentado ante os Concellos de Silleda, Dozón, Rodeiro e Agolada o sindicato pide que esta mellora económica teña un reflexo efectivo nas nóminas do persoal auxiliar e contribúa tamén a reforzar a estabilidade do emprego nun servizo que cada vez atopa máis dificultades para cubrir baixas, vacacións ou novas incorporacións.

Desde CSIF, lembran que o SAF constitúe un recurso fundamental, especialmente no medio rural, xa que permite que moitas persoas maiores e dependentes poidan continuar vivindo no seu domicilio, á vez que contribúe a fixar poboación e xera emprego feminino no ámbito local.

 PUBLICIDADE

Preme na imaxe para contactar con nós!

O sindicato subliña que as auxiliares desenvolven o seu labor en condicións que non se corresponden coa dureza nin co valor social do seu traballo. A diario afrontan unha elevada carga física e emocional, percorren numerosos quilómetros entre domicilios e asumen en solitario tarefas de coidado esenciais, unha responsabilidade que, a xuízo de CSIF, segue sen reflectirse de forma xusta nas súas retribucións.

Por iso, a organización considera que sería inaceptable que, existindo un aumento claro e sostido do financiamento público do servizo, os concellos non o trasladen ao persoal que o fai posible, perpetuando salarios baixos e condicións laborais precarias. CSIF ponse ao dispor dos concellos para abordar esta cuestión nos espazos de diálogo e negociación que correspondan.