Cruces e Santiso solicitan unha reunión urxente coa Xunta pola suspensión da barcaza de Portodemouros

A paralización do servizo afecta gravemente á mobilidade veciñal e á actividade económica da zona

Laura Moure/Cruces/Santiso

Os alcaldes de Vila de Cruces e Santiso, Luís Taboada e Manuel Adán, solicitan á Xunta de Galicia unha reunión de carácter urxente para abordar a suspensión temporal da barcaza de Portodemouros. Esta semana os rexedores dos dous Concellos mantiveron unha reunión de traballo para analizar a situación. No encontro tamén participaron José Luis Carril, membro da Asociación de Afectados do Encoro de Portodemouros, e Ana Mouriño, veciña de Beigondo e propietaria dun local de hostalería directamente afectado pola paralización do servizo.

O transbordador non é a única vía de comunicación entre Vila de Cruces e Santiso, pero si a máis directa. A súa suspensión obriga a dar longos rodeos por estrada, o que provoca graves prexuízos á veciñanza, especialmente a agricultores e gandeiros que teñen propiedades a ambos lados do encoro. Ademais, afecta tamén a estudantes que acoden diariamente ao instituto e a traballadores que se desprazan a industrias situadas a unha e outra beira, así como aos negocios locais que dependen do tránsito constante entre ambos municipios.

 PUBLICIDADE

Os alcaldes lembran que a Xunta de Galicia ten a obriga de garantir a continuidade do

servizo as 24 horas do día, os 365 días do ano, dado o seu carácter esencial. “Non podemos permitir que as nosas aldeas queden illadas por falta dun servizo que é

básico para a mobilidade e para a vida diaria da xente”, subliñaron.

PUBLICIDADE

Preme na imaxe se queres contactar connosco.

Os concellos esixen que se habiliten medidas alternativas inmediatas mentres duren os

traballos de mantemento, ao tempo que reiteran a súa disposición ao diálogo coa Administración autonómica para buscar unha solución estable que evite situacións de illamento no futuro.