top of page

‘Corcosendo’, o proxecto nacido na Ulloa que recolle e revaloriza a memoria das costureiras

Este sábado inaugúrase na Igrexa de Vilar de Donas, en Palas de Rei, unha exposición multidisciplinar


Laura Moure/Palas de Rei

Hoxe, sábado día 23, a Igrexa de Vilar de Donas, en Palas de Rei, será o escenario no que se materialice ‘Corcosendo’. É un dos 16 programas seleccionados en todo o país polo Insituto da Muller para recibir financiamento e impulsar a creación femenina.

A igrexa de Vilar de Donas, en Palas. Autor: Ecos da Comarca.

O proxecto é unha iniciativa que xorde no departamento de audiovisuais do Instituto de Estudos Ulloáns. A gran cantidade de mulleres na zona que tiveron relación co oficio da costura, de diferentes formas, son a pedra angular do proxecto, e o punto de partida. O obxectivo é poñer en valor a relevancia histórica do seu testemuño e a elas como creadoras.


Publicidade

É un percorrido que comeza nas costureiras das portas, que facían roupa e arranxos en casas alleas levando a máquina na cabeza, ata as cooperativas que xurdiron nos anos 80 e 90 por toda Galicia, pasando tamén polas que coseron na emigración.


O primeiro paso foi localizalas e realizar unha serie de entrevistas, para recoller a memoria do oficio da costura. Todo o material recuperado a través deses encontros converteuse nunha exposición de 33 retratos de mulleres que foron costureiras nalgún momento da súa vida, e que segundo recoñecen algunhas delas, non poden deixalo. Están intervidos pola artista téxtil Verónica Ramilo, en función da historia de cada unha das súas protagonistas.


Publicidade

Completan a exposición unha performace a cargo de Helena Salgueiro, unha videocreación do cineasta Xabier Mailán, titulada ‘As mas núas de quen nos vestiu’, e unha canción composta por Zoelas, que interpretarán o día da inauguración. Todas estas propostas artísticas foron creadas especificamente para ‘Corcosendo’, e baseadas no material recollido das costureiras.


Máis adiante vaise sumar tamén un libro que recolla os seus testemuños e historias, con prólogos da artista Ana Pérez Valdés e da escritora Olga Novo, Premio Nacional de Poesía 2020, máis unha aplicación para o teléfono móbil, ‘Arquitecturas da memoria’.


Publicidade

As costureiras

Algunhas das historias que se recuperaron a través de ‘Corcosendo’ son, por exemplo, a de Hilda. Estando emigrada en Inglaterra cosía na casa para poder coidar a súa filla. Cosía para Bruce Oldfield, un dos deseñadores favoritos de Lady Di, que incluso participou na creación do seu vestido de voda. Tamén foi o artífice do vestido para a coroación da raíña Camila. “Foi unha época moi bonita a de coser así”, recoñece, “o da costura valeu unha vida”.


Pola súa parte Concha conta que comezou a coser con 12 anos polas portas, e que puxo un taller co seu home, que era sastre, cando casou aos 20: “Iamos a todos os lados coa maquiniña na cabeza, eramos as artistas á broma cosendo sentadas nun tallo, contábamos contiños de todo o corazón”. Seguiu cosendo sempre, e recuperou un arcón de sabas de liño ou colchóns de estopa, que transformou en cortinas ou manteis. É un exemplo do valor creativo do traballo destas mulleres, que a miúdo quedou difuminado no seu papel de coidadoras, e non recibiu o recoñecemento que merece.

0 comentarios

Comments


IRS.gif
Copia de ¡TU Anuncio!.gif
Ecos_da_Comarca_neg.png
bottom of page