Comezan as obras para ampliar a rede de abastecemento de auga na parroquia de Ponte

Ecos da Comarca/Silleda

O Concello de Silleda vén de iniciar os traballos para a ampliación da rede municipal de abastecemento de augas na parroquia de Ponte. Concretamente, estanse a instalar as tubaxes necesarias para levar a traída municipal ata o lugar de O Espiño, cunha ampliación posterior cara ao núcleo de Carderrei.

Durante a execución das obras faise necesario realizar un pase subterráneo na estrada PO-205 (Silleda-Vila de Cruces), á altura do centro social da parroquia, punto no que remata actualmente a rede de abastecemento e desde onde se acometerá esta nova conexión.

Estes traballos, que continuarán nos vindeiros días, estanse a acometer dende a Concellería de Obras, para a mellora e ampliación da rede municipal, con actuacións que veñen a completar as realizadas hai uns meses coa instalación do servizo municipal de auga no lugar de Trasfontao, na parroquia de Silleda.

As obras estanse a realizar con medios e persoal propio do Servizo Municipal de Augas, o que permite abaratar de xeito considerable os custes derivados deste tipo de investimentos.

Publicidade

Preme na imaxe se queres contactar connosco.

“Temos un equipo capacitado e comprometido, que demostra día a día que temos no Concello o mellor persoal para levar a cabo estas actuacións”, sinala a alcaldesa Paula Fernández Pena.

Nos vindeiros meses a concellería de Obras continuará coa extensión da rede municipal de abastecemento a novos lugares, logo de extender nos últimos anos a traída de augas a parroquias como O Castro, Saídres, Cortegada, Taboada, Manduas, ou lugares como Toxa, entre outros.