Alberte Lamazares propón unha actualización do orzamento municipal de Rodeiro
- ecosdacomarca
- hace 11 minutos
- 4 Min. de lectura
Ecos da Comarca/Rodeiro
O responsable da Área Económica do Concello de Rodeiro, Alberte Lamazares, considera que, unha vez equilibrada a situación económica herdada e a espera concluir a Relación
de Postos de Traballo (RPT) impulsada polo actual executivo, é mais operativo aprobar unha actualización orzamentaria que un novo orzamento para o ano 2025. "Ese é o motivo polo que convocamos para este venres un pleno extraordinario para dita actualización", sinala.
Debe recordarse, apunta, "que a aprobación dunha RPT é obrigatoria por lei e que en Rodeiro estaba sen realizar ao igual que outras moitas cousas. A súa finalización suporá modificar unha parte importante das partidas do futuro orzamento; polo tanto, carecería de sentido presentar agora un documento para o ano 2025 e outro no mes de xaneiro para o ano 2026 con novas actualizacións".
"Consideramos máis práctico actualizar un ano máis o orzamento en vigor e presentar o orzamento de 2026 con ingresos suficientes, débeda herdada equilibrada e os pertinentes axustes técnicos para poder afrontar un fin de lexislatura cunha forte consolidación en canto a proxectos executados, melloras en acesos e servizos públicos e sociais incrementados. Actualizar o orzamento é unha ferramenta de grande utilidade, xa que, como será o caso, imos incrementar recursos en 26 partidas e xerar unha nova. Debe terse en conta que o orzamento actual contén arredor de 60 partidas e, co conxunto de actualizacións realizadas ao longo deste ano, actualizáronse máis de 35".
E indica que para visualizar a importancia deste traballo, "destacamos os resultados máis
salientables:
Coas diferentes modificacións de crédito acadáronse axudas para a contratación de persoal socorrista para a piscina municipal; para a adquisición dunha varredora viaria; para a pavimentación do camiño municipal A Torre –Axiaz; para a mellora do camiño Ourín – Asperelo; para a restauración do treito urbano do río de Rodeiro; para a implantación dunha planta de xeración fotovoltaica para autoconsumo colectivo; e para a mellora da capa de rodadura nos camiños de San Xoán de Camba e A Portela.
Coa modificación de crédito núm. 9, que se propón mediante esta memoria, pretendemos modificar 24 partidas, que, sobre todo afectan a atención social, cultura e o deporte, a mellora de pistas e accesos entre outros, tal e como se
detalla a continuación".
"As partidas vinculadas ao Capítulo I increméntanse para poder facer fronte ás nóminas do persoal municipal, debido ao desfase existente entre o orzamento vixente e a realidade actual".
Os suplementos de crédito do Capítulo II destínanse a gastos correntes en bens e servizos. Destaca:
Atención a persoas con dependencia: increméntase a partida en 40.000 euros. "Destacar que actualmente todas as persoas con grao 3 e 2 están atendidas, deixando atrás épocas nas que se atendía con dificultade incluso os graos máis altos".
Cultura: increméntase en 20.000 euros, acadando unha partida total de 75.000 euros. "A modo comparativo, no ano 2019, último exercicio completo liderado pola actual portavoz do PP de Rodeiro, o gasto comprometido nesta mesma partida foi de 95.345,81 euros, o que evidencia a boa xestión realizada nos últimos anos xa que é fácil visualizar o gran dinamismo que hoxe ten Rodeiro con eventos tan relevantes coma O Sabor Labrego e a Feira da Vaca Rubia do País", explica Lamazares.
Mellora de pistas e camiños: increméntanse 80.000 euros. Durante esta lexislatura estase a facer un grande esforzo na mellora dos accesos ás aldeas, revertendo o abandono existente en etapas anteriores. "Cómpre destacar o acordo coa Mancomunidade Terras do Deza que permite dispoñer da maquinaria mancomunada o dobre de días que en exercicios previos, o que supón arranxar o dobre de camiños de zahorra, imprescindibles para o sector primario. Isto, sumado á nova maquinaria adquirida polo Concello, facilita un servizo máis eficaz ás aldeas".
Ademais, as partidas 920 relacionadas co funcionamento diario da administración local, suministros, comunicacións, material de oficina, tributos, gastos diversos, proxectos, etc., increméntanse en 203.000 €.
Publicidade
As partidas propostas no Capítulo III destinanse a colaboración coas asociacións culturais e deportivas, cuxo labor é esencial para o dinamismo social da localidade. "Por segundo ano consecutivo, a suma total de axudas ascende arredor de 58.000 €, fronte aos aproximadamente 40.000 € da etapa anterior. Isto demostra tamén o valar da actualización do orzamento xa que, con ela, cumprimos co 100% dos compromisos adquiridos"
CAPÍTULO IV
"Proponse suplementar a partida 945/463, destinada ao financiamento da Mancomunidade Terras do Deza, permitindo manter o incremento de días de uso da maquinaria para arranxo de pistas de zahorra".
CAPÍTULO VI
O suplemento desta partida destínase ao arranxo da pista que discorre entre o
polígono e Álceme.
CRÉDITO EXTRAORDINARIO
"Xérase crédito extraordinario para mellorar as condicións dunha das traídas de augas do casco urbano, que se atopaba nunha situación moi deficiente e con risco sanitario", sinala o concelleiro.
Publicidade
RESUMO ECONÓMICO
Total suplementos de crédito: 556.356,47 €
Total crédito extraordinario: 9.448,75 €
TOTAL EXPEDIENTE: 565.805,22 €
Financiamento:
Remanente municipal: 365.805,22 €
Maiores ingresos (IBI urbana): 200.000,00 €
"Estes maiores ingresos proveñen da actualización catastral de parcelas clasificadas como urbanas polo PXOM, documento que non foi actualizado polo anterior executivo e que este goberno considera prioritario revisar nesta lexislatura", explica.
Ante todo isto solicita:
Primeiro. Tramitar o expediente de modificación de crédito sobre o orzamento
xeral do Concello para o exercicio 2017, prorrogado para o exercicio 2025, co detalle económico que se recolle anteriormente.
Segundo. Solicitar ao secretario-interventor a emisión dos informes preceptivos.
Tercero. Incluir a aprobación do expediente na vindeira sesión plenaria, previo
ditame da Comisión Especial de Contas.
Comentarios