Alberte Lamazares: "Luis López está desacreditando a Deputación por intereses electorais"

Ecos da Comarca/Rodeiro

O alcalde en funcións de Rodeiro, Alberte Lamazares, considera "lamentable" que o presidente da Deputación de Pontevedra, Luis López, "estea utilizando a institución provincial para intentar xustificar unha decisión política que está a prexudicar aos veciños de Rodeiro".

Alberte Lamazares.

"O expediente do vial de Carboentes aparece na propia web da Deputación como listo para fiscalización. Ademais, o requirimento realizado pola Deputación o 22 de abril foi contestado polo Concello e nel non se facía referencia ás cuestións que agora se están trasladando publicamente", sinala Lamazares.

Ademais afirma tamén que o Concello de Rodeiro non recibiu en xuño ningún requirimento como o que agora asegura a Deputación, polo que considera que "Luis López debería explicar de onde sae esa afirmación".

 PUBLICIDADE

Preme na imaxe para obter máis información do evento.

Ante esta situación, o Concello de Rodeiro solicitou xa á Deputación acceso ao expediente completo, co obxectivo de coñecer todos os informes e actuacións realizadas na súa tramitación. "Temos fundadas sospeitas de que se están producindo prácticas dilatorias por razóns alleas á legalidade e vinculadas exclusivamente a unha decisión política. Por iso queremos coñecer exactamente que está acontecendo e que decisións se están tomando dentro da Deputación", sinala Lamazares.

O alcalde en funcións considera especialmente grave que un investimento de 494.723 euros para Rodeiro leve meses sen avanzar, mentres a Deputación continúa aprobando solicitudes doutros concellos. "Luis López está facendo méritos máis que suficientes para ser reprobado polo Concello de Rodeiro, pero aínda está a tempo de rectificar. Ten unha oportunidade para deixar de utilizar a Deputación con fins políticos, desbloquear os fondos de Rodeiro e cumprir cos veciños deste concello".

 PUBLICIDADE

Preme na imaxe para contactar connosco.

"Non pedimos ningún trato de favor. Pedimos que Rodeiro sexa tratado como o resto dos concellos da provincia. Luis López non debería desacreditar o prestixio dunha institución como a Deputación de Pontevedra por intereses electorais".