Alba Forno pídelle explicacións a Crespo por un novo episodio de verteduras no río Asneiro, en Botos

“Lalín non pode seguir normalizando a contaminación dos seus ríos”, recalca a voceira socialista deste municipio

Ecos da Comarca/Lalín

A voceira municipal socialista de Lalín, Alba Forno, reclamou onte explicacións urxentes ao goberno municipal de José Crespo tras a aparición dun novo episodio de verteduras contaminantes no río Asneiro, á altura de Botos. Para a portavoz, este novo episodio "non é un feito illado, senón un síntoma máis dun problema ambiental que o Partido Popular leva máis de dúas décadas sendo incapaz de resolver".

Vertedura no río Asneiro en xaneiro de 2026.

"Lalín non pode seguir normalizando a contaminación dos seus ríos”, advertiu, sinalando que “o realmente preocupante é que estas noticias xa non sorprenden a ninguén, porque ano tras ano volvemos ver as mesmas imaxes e o goberno do PP é incapaz de poñer unha solución definitiva", afirmou Forno.

Así, lembrou que nos últimos anos o Concello "foi sancionado en múltiples ocasións por Augas de Galicia por verteduras relacionadas coas estacións depuradoras municipais, acumulando miles e miles de euros en multas" que, denuncia, "acabamos pagando entre todos os veciños e veciñas".

  PUBLICIDADE

Preme para obter máis información.

Con todo, considera que “o máis grave non son as sancións económicas, senón o dano ambiental continuado que estamos causando aos nosos ríos”. “Ese dano non se mide en euros, mídese na perda de calidade das augas, na degradación dos ecosistemas e na imaxe que proxectamos dun concello que debería ser un referente pola riqueza do seu patrimonio natural", sinala.

  PUBLICIDADE

Preme na imaxe para obter máis información do evento.

 A portavoz socialista reclama ao goberno de Crespo a que explique con total transparencia a orixe desta nova vertedura, os seus efectos, as medidas adoptadas ata o momento e que actuacións pensa impulsar para evitar que situacións como esta volvan repetirse.

"O Concello non pode limitarse a pagar unha multa cada vez que hai unha vertedura e non facer máis nada, pois  levamos máis de vinte anos de problemas recorrentes, o que fai falta é unha solución definitiva”, engade.

  PUBLICIDADE

Preme na imaxe e contacta con nós!

Forno cuestiona a falla de políticas ambientais reais no goberno do PP, sinalando que “non lles interesa situar a protección ambiental como unha prioridade política real porque non dá votos”. Finalmente subliña que “de nada serve que Crespo teña contratado un asesor para recoller lixo das cunetas e cortar a herba das medianeiras, mentres o Concello contamina pola porta de atrás os nosos ríos”.